اسقاط شرعية يوليو واعلان الجمهورية الثانية

هي العيال بتوع التحرير دي عايزة ايه تاني؟

السؤال التاريخي اللي بيردده جزء مش قليل من المصريين.. ورغم تحفظي علي السؤال في حد ذاته لأن المؤمنين بالثورة وبأهمية تحقيق أهدافها ما هماش موجودين في التحرير فقط ولكن موجودين في كل المحافظات وكل واحد فيهم بيشارك بطريقته في نشر الفكر الثوري عبر المبادرات المختلفة والمسيرات والمظاهرات التي يسميها البعض بالفئوية

المهم نرجع للسؤال اللي الثوار بقالهم بيجاوبوا عليه من يوم 11 فبراير لغاية النهاردة ولكن للأسف فيه ناس كتير مش فاهمة أو مش عاوزة تفهم أو فاهمة وبتستهبل

ولكن لنكون منصفين يجب الإعتراف ان عدم وجود قيادة واضحة للثورة واللي هو كان أهم أسباب نجاحها بيخلي ناس كتير متلخبطة ومش فاهمة فعلا العيال دي عايزة ايه.. وأكبر دليل علي كده انك أما تسأل أي حد هي ايه مطالب يوم 25 يناير اللي جاي هتسمع أكتر من اجابة.. من اسقاط المجلس العسكري لتسليم السلطة للبرلمان لإنتخاب رئيس جمهورية قبل انتخابات الشوري لتطهير الداخلية والإعلام وحتى الشعار الموحد بين جميع القوي الثورية "يسقط حكم العسكر"  ففئة كبيرة من الشعب مش فاهماه وكمان خايفة منه.. اللي  فاكر ان الثوار بيطالبوا باسقاط الجيش واللي فاكر انهم بيطالبوا باسقاط المجلس العسكري المتمثل في أعضائه ال19

ولكن الحقيقة ان هتاف "يسقط حكم العسكر" مش المقصود به طنطاوي وشلته لكن المقصود بيه حكم العسكر اللي مسيطر علي مقاليد الحكم في مصر من يوليو 1952.  الناس بس نسيت علشان مبارك لبسلهم بدلة وبسبب ظهور جمال مبارك ورجال الأعمال علي الساحة في ال10 سنين اللي فاتت 

المجلس العسكري نجح تماما في ايهام قوي الشعب ان الثورة دي كانت علي نظام مبارك وابنه مش علي نظام العسكر ومن اللحظات الفارقة اللي عبر عنها اللوا ممدوح شاهين عن هذه الفكرة أما اتسأل انتم ليه مالغيتوش نسبة ال50% عمال وفلاحين في مجلس الشعب. فكانت الاجابة إن دي من مكتسبات ثورة يوليو وما نقدرش نمسها 

وعلشان كده طبيعي انك ما تحسش ان فيه حاجة اتغيرت بعد الثورة.. الانتخابات كانت مش مزورة آه لكن بتتم في نفس أجواء أي انتخابات مضت ما بين أحكام قضائية لإعادتها بسبب تغيير صفة مرشح من عمال لفئات وما بين استخدام فج للشعارات الدينية . وعمليات فرز فوضوية, الداخلية لسة بتعامل المواطنين كأنهم حيوانات والإعلام بينافق اللي في السلطة والإخوان بتفاوضوا مع العسكر.. ما هي كل دي مكتسبات ثورة يوليو

وعلشان كده علي الثوار انهم يوصلوا فكرتهم للناس عن طريق صياغة المطلب الحقيقي لثورة 25 يناير وهو اسقاط شرعية يوليو والإعلان عن تأسيس الجمهورية الثانية

النظام هو هو والوساخة هي هي

مايو ٢٠٠٦

أكتوبر ٢٠١١

صفقة الأحزاب والمجلس العسكري وانعدام الخيال

أصيب الشارع السياسي اليومي بصدمة لتوقيع 13 حزبا علي بيان يعلنوا فيه تأييدهم الكامل للمجلس العسكري وتقديرهم لدوره العظيم في المرحلة الانتقالية.  لم يمضي علي نشر البيان إلا ساعات قليلة وبدأت حملات استقالات واسعة في بعض هذه الأحزاب اعتراضا علي خيانة الحزب للشعب والثورة علي حسب تعبيرهم

من وجهة نظري الشخصية أرفض تخوين أي شخص أو كيان مهما كان ما اقطرفه من ذنب. بل أني لا أري من أن ماحدث لا يعد خيانة بل هو فشل لأول اختبار حقيقي تمر به الأحزاب من بعد الثورة. 

 يمكنك تقسيم ال13 حزب الموقعين علي البيان ل3 أقسام وستجد ان موقفهم من البيان طبيعي جدا

١- الإخوان

توقيع الإخوان وحزبهم الحرية والعدالة علي بيان تصرف طبيعي جدا.. لا يتصور عاقل أن الإخوان المسلمين لديهم أدني اهتمام في المرحلة الحالية بالغاء المحاكمات العسكرية وتحديد جدول زمني واضح يمهد لتخلي المجلس العسكري عن السلطة في أقرب وقت ممكن. الإخوان لا يهمهم في اللحظة الحالية إلا ان تتم الانتخابات البرلمانية في أقرب فرصة وان يتاح لهم السيطرة علي المجلس القادم وقد حصلوا علي ذلك بموافقة المجلس العسكري علي تعديل المادة الخامسة

٢- الأحزاب القديمة

توقيع الأحزاب القديمة أو كما يحلو للبعض تسميتها ببأحزاب صفوت الشريف أمر متوقع بل عدم توقيعهم عليها كان سيكون أمراً عجيباً يدعو للقلق. لا أري سببا للصدمة. هل منكم من كان يتخيل أن يقول موسي مصطفي موسي لا للمجلس العسكري؟ لا تتوقع خيرا من أحزاب أنشئت بقرار من أمن الدولة وتعودت أن تأكل من الفتات الذي كان يتركها لها الحزب الوطني

٣- الأحزاب الجديدة

قد تكون الصدمة في محلها قليلا عندما نتحدث عن أحزاب أنشئت من رحم الثورة وكان من المفترض أن تحافظ علي مبادئها ولكن في ظل التخبط الذي يدير به المجلس العسكري المرحلة الانتقالية بالإضافة لفشل هذه الأحزاب في تحقيق وجود ملموس في الشارع.. فضل هؤلاء اللعب علي المضمون والقيام بصفقة تضمن لهم تواجد في المرحلة المقبلة

-----------------------------------------------

ما فعله الأحزاب اليوم ليس خيانة بل غباء سياسي يثبت انعدام الخيال عند هذه الكيانات بالاضافة إلي غياب تام للثقة في الشارع وللملايين الذين قاموا بالثورة. للأسف تعاملت هذه الأحزاب مع المجلس العسكري كما كانت ستتعامل مع مبارك في موقف مشابه وهو مايثبت ان ليس المجلس العسكري وحده الذي لم يدرك أن ما حدث كان ثورة بل أن الأحزاب نفسها لم تصلها الرسالة.

------------------------------------------------

أفضل تعليق يلخص ما حدث اليوم كان علي تويتر من ابراهيم الشافعي:

الاحزاب من كتر الفرجة علي سياسة بورنو رخصية ايام مبارك, بقي عندهم بريماتشور ايجاكيوليشن

المجلس العسكري وقيم النظام البائد

ما شهدته البلاد في الفترة الماضية يؤكد بما لا يدع مجالاً للشك بأن هذه الثورة لم تكتمل بعد بل لكي نكون أكثر دقة فهي مازالت في بدايتها.. فالثورات تقوم بالاساس لتغيير أفكار وأساليب الحكم لا لتغيير أشخاص فقط

منذ بداية الثورة وهناك تخوف من حكم العسكر ولو لفترة انتقالية.. التخوف نابع من أسباب معروفة للجميع أولها أن المجلس الأعلي للقوات المسلحة هو نفس المجلس الذي كان يرأسه مبارك طوال ال30 عاما الماضية وثانيها أن المؤسسة العسكرية في أي دولة في العالم هي مؤسسة محافظة بـطبعيتها لا تميل للتغيير السريع

رغم هذه المخاوف فان الثوار وجدوا نفسهم يوم التنحي في وضع لا يسمح لهم بالاختيار فمن جهة كانت الأغلبية من الشعب لم تعد تحتمل تعطيل الحياة بعد 18 يوما عصيبا ومن الجهة الاخري لم يكن هناك بديل اذ ان الثورة لم يكن لها قائد ولا حتى مجموعة قائدة يتفق عليها الجميع لكي تحكم في المرحلة الانتقالية

 ازدادت هذه المخاوف طوال ال6 أشهر الماضية خصوصا مع ازدياد تحويل المدنيين الأشراف الي المحاكمات العسكرية والبطء الشديد في تنفيذ مطالب الثورة حتى جاء خطاب اللواء محسن الفنجري الذي كان في رأيي اللحظة التي تأكدت فيها القوة الثورية ان الجيش لا يحمي ثورتهم بل ثورة أخري يتصورون انهم من صنعوها  وتوالت السقطات منذ ذلك الخطاب حتى أيقن الجميع اننا مازلنا نحكم بنفس القيم التي قامت ثورة 25 يناير من اجل دفنها للأبد

١- الحكم الأبوي

جاء صورة اللواء محسن الفنجري بصوته العالي واصبعه المحذر ليذكرنا بالنظام البائد.. النظام الذي كان يتعامل معنا علي انه الأب العالم ببواطن الأمور وان الشعب هو ذلك الشاب القاصر المتهور الذي لا يعرف مصلحته ومن واجبه احترام والده مهما كانت الظروف بل ومن حق الوالد قرص أذنيه في حالة خروجه عن الخط المرسوم له

٢- إعلام الدولة المضلل

ثم جاءت تخطية الإعلام الحكومي لإعتصام التحرير ووصف المعتصمين بالبلطجية ليؤكد للجميع ان إعلام الدولة لم يطهر ولم يصبح مستقلا كما هو الحال في كل البلاد الديمقراطية بل لا يزال تحت رحمة السلطة الحاكمة وكما كان ينافق مبارك فهو ينافق اليوم المجلس العسكري حتى ان مذيعة احدي القنوات التابعة للدولة وصفت المظاهرة التي كانت في ميدان روكسي بأنها مظاهرة حاشدة تضم أكثر من 50 ألف متظاهر

٣- اسلوب التخوين

ثم جاء البيان رقم 69 للمجلس العسكري الذي اتهم صراحة حركة 6 أبريل بالتخطيط للوقيعة ما بين الجيش والشعب والاتهامات المرسلة للواء الرويني للحركة علي قناة الجزيرة و مافيها من تلقي أموال من الخارج والوقوف وراء أحداث الفتنة الطائفية ثم اتهام حركة كفاية بأنها حركة غير مصرية وهي اتهامات قد تكون أكثر حدة من اتهامات الحزب الوطني للحركتين.. بل انه لا يوجد عاقل في مصر لا يعلم دور حركتي 6 ابريل وكفاية في ثورة 25 يناير وما تعرضوا له من تنكيل واعتقالات من النظام البائد.. ومن هنا نسأل اللواء الرويني ومجلسه لماذا دعمتوا ثورة تتهمون من اطلق شرارتها الأولي بالعمالة؟

٤- التعدي علي المتظاهرين

ثم جاءت موقعة العباسية التي قامت فيها مجموعة من البلطجية وأهالي العباسية بضرب متظاهرين سلميين كما يوضح الفيديو التالي وقامت فيها الشرطة العسكرية بلعب دور المحايد السلبي بل ان شهادات الأهالي والمشاركين في المسيرة اثبتت ان الأهالي كانوا مشحونين من قبل وصول المتظاهرين نظرا لقيام بعض الأفراد باقناعهم أن القادمين بلطجية ينتمون لحركة 6 أبريل العميلة ويهدفون الي مهاجمة أهالي العباسية في منازلهم.

٥- اغتيال الشخصيات العامة

ثم جاءت اليوم مكالمة اللواء عبد المنعم كاطو في برنامج صباح دريم وتعليقه علي قراءة دينا عبد الرحمن مقدمة البرنامج لمقالة الكاتبة الصحفية المتميزة نجلاء بدير والتي طالبها سيادة اللواء بقراءة مقالات الكتاب المحترمين ليعلن ضمنيا ان الكاتبة نجلاء بدير كاتبة غير محترمة ولعلنا نذكر سيادة اللواء ان نجلاء بدير من الكاتبات الذين كانوا ينتقدون ويهاجمون نظام مبارك في مجده بينما كان هو جزء من نظام يخرج علي الهواء اليوم ليسميه النظام البائد بفضل نجلاء بدير وامثالها

٦- علاقة المال بالسلطة

واخيرا جاء ما ترتب عليه رد الاعلامية دينا عبد الرحمن علي سيادة اللواء وهو فصلها من قناة دريم علي يد صاحب القناة رجل الأعمال أحمد بهجت وأنا لا ادعي ان الرجل قد تلقي تعليمات بفصل المذيعة ولكن حتى في حالة اتخاذه هذه الخطوة بمفرده فهذا يدل انه كرجل أعمال تهمه مصالحه وأمواله مازال يري انه في النظام الجديد عليه ان لا ينتقد من يجلس علي السلطة والا خسر كل شيء مما يذكرنا بفصل نجيب ساويرس لابراهيم عيسي من قناته أيام حكم مبارك

هذا ما تم رصده في أسبوع فقط.. الازال هناك من لا يفهمون لماذا الثورة لم تنته؟  الازال هناك من لا يعون لماذا يعتصم أطهر من انجبتهم هذه البلد في التحرير؟

وائل غنيم مش عارف يشهر جمعية أهلية

في ليلة تويترية هادئة وأنا في صراع شديد مع النوم.. فوجئت بالتويتة التالية من أحد االأشخاص الذي ارتبط اسمها بثورة 25 يناير

حاجة تضايق إن بعد أكتر من 40 يوم لسه منتظرين ما يسمى "الموافقة الأمنية" لإشهار المؤسسة الخيرية اللي أنا مشارك مع آخرين في تأسيسها في مصرMon Jul 18 04:09:00 via webWael Ghonim
Ghonim

قبل ما اعلق علي التويتة.. أحب أوكد اني ضد اختزال ثورة عظيمة كثورة 25 يناير في شخص أيا ان كان دوره لأنها ثورة شعب في المقام الأول.. فأنا حتى أكره تعبير ثورة الشباب المتداول في وسائل الاعلام المختلفة.. ولكن أعتقد لو اخترنا 100 شخصية اللي كانوا الأكثر تأثيرا في هذه الثورة فأعتقد ان ممكن نعتبر وائل غنيم منهم يعني.. أولا الراجل كان مسئول عن الصفحة اللي كانت أول من دعا للتظاهر في اليوم وبعد ما خرج من المعتقل عمل مقابلة مع مني الشاذلي ابكت مصر كلها وكانت في رأيي لها تأثير كبير في الأيام الأخيرة قبل التنحي

المشكلة بقي ان الشخص ده مش عارف يطلع تصريح علشان يعمل جمعية خيرية.. أيوان جمعية خيرية.. مش حزب يعني واليعوز بالله.. لو حضرتك مش متخيل الصورة.. يعني هي حاجة كده زي مثلا ان جمال عبد الناصر بعد 23 يوليو حب يفتح كشك سجاير فقولوا معلش استني شوية لحد ما نشوف أمن دولة رأيه ايه في الموضوع ده

ياخي أحا..  لسة في حد بيسأل هما ليه فيه ناس معتصمة في التحرير؟

طيب هما معتصمين علشان وائل غنيم ياخد تصريح الجمعية الخيرية بتاعته..حد له شوق في حاجة؟

قال وايه بيقولك ان المصريين أول ناس يعملوا ثورة والثوار مايوصلوش للحكم.. شكلها هتبقي أول ثورة الثوار اللي عملوها مايعرفوش ياخدوا تصريح جمعية خيرية 

إلى أعضاء المجلس الأعلي للقوات المسلحة

قرر المدونون المصريين ان يكون يوم 23 مايو يوم التدوين عن المجلس الأعلي للقوات المسلحة التي يحكم البلاد منذ تنحي الرئيس السابق محمد حسني مبارك في الحادي عشر من فبراير 2011. اقول يوم التدوين عن المجلس الأعلي وليس يوم التدوين ضد المجلس الأعلي لأن الهدف ليس الهجوم علي المجلس الأعلي من باب الهجوم فقط ولكن ايمانا بأن من الضروري ان يكون الشعب والمجلس 

الأعلي علي نفس الخط لكي تكتمل هذه الثورة وتحقق الأهداف التي قامت من اجلها

ولهذا الهدف من هذه التدوينة توضيح 3 نقاط رئيسية يختلف عليها تيار كبير من الشعب من جهة والمجلس الأعلي من الجهة الاخري

١ -  لعلك لاحظت اني استخدم عبارة المجلس الأعلي وليس الجيش عندما اتحدث عن الهيئة التي تحكم البلاد في الوقت الراهن.. فهذه نقطة الخلاف الأولي.. المجلس الأعلي للقوات المسلحة يحكم البلاد طبقا للاعلان الدستوري ويقوم بأعمال رئيس الجمهورية ومجلسي الشعب والشوري أما الجيش المصري فهو المؤسسة الوطنية التي تقوم بحماية حدود البلاد ولكن المجلس الأعلي يصر علي الخلط بين الاثنين وقد ظهر هذا واضحا في البيان رقم 56 بتوجيه اتهامات الخيانة لكل من ينتقد المجلس الأعلي..  فنقدنا للمجلس الأعلي هو بمثابة نقد لرئيس الجمهورية الذي يحكم البلاد وليس نقد للجيش المصري وعلي المجلس الأعلي الكف عن هذه اللعبة السخيفة وهي بالمناسبة شبيهة جدا بلعبة النظام السابق الذي كان يتهم يهاجم الرئيس أو النظام بالعمالة لانه كان يتعمد الخلط ما بين النظام والدولة

٢ - علي المجلس الأعلي ان يدرك ان ثورة 25 يناير اسقطت شرعية ثورة يوليو وأن هذه الثورة لم تكن ضد نظام مبارك بل ضد النظام الذي يحكمنا منذ عام 1952.. ومن الواضح ان المجلس الأعلي لم يستوعب هذه الحقيقة بعد ولهذا تتسم خطواته بالبطيء والحذر الشديد وقذ ظهر هذا واضحا في مداخلة لأحد قيادات المجلس الأعلي في برنامح تلفزيوني عندما سئل عن سبب الابقاء علي مادة ال50% عمال وفلاحين في مجلس الشعب فكان رده ان الغاء هذه المادة يعد انقلابا علي ثورة يوليو

٣ - تحديد آلية اتخاذ القرار داخل المجلس الأعلي والاعلان بوضوح عن المستشارين السياسيين للمجلس.. فمن غير المقبول خروج قوانين من قانون الأحزاب وقانون مباشرة الحقوق السياسية من غير حوار مجتمعي و من غير توضيح كيفية خروج هذه القوانين للنور.. ومن غير المقبول أيضا تعيين لجنة لتعديل الدستور لا يعلم أحد الأسس التي تم اختيار أعضائها عليها.. فمن كان وراء اختيار شخص كالقيادي الاخواني صبحي صالح في هذه اللجنة.. فتصريحاته الاخيرة كعدم الاعتراف بالمسلم الليبرالي والمسلم الاشتراكي والمسلم العلماني ثم كلامه عن وجوب زواج الاخواني من اخوانية يضع المجلس الأعلي في موضع السؤال عن كيفية اختيار شخص بهذه العقلية في لجنة بهذه الأهمية ولهذا علينا ان نسأل من هم الاشخاص الذي ياخذ المجلس الأعلي رأيهم قبل اتخاذ مثل هذه القرارات وان لم يكن هناك مستشارين سياسيين فالمصيبة اكبر لأن المجلس الأعلي باعترافه شخصيا ليس لديه خبرة سياسية في ادارة شئون البلاد

٤ - أهمية الكف عن استخدام العنف مع المتظاهرين أيا كانت مشروعية مطالبهم فمن غير المقبول ان يضرب مصري بعد قيام هذه الثورة العظيمة بسبب التعبير عن رأيه وحالة خروج المواطن عن حدود لقانون يتم التعامل معه بالقانون ايضا وليس باستخدام القمع والاهانة ولهذا ايضا يجب ان تتوقف تماما المحاكمات العسكرية ويعرض المتهم أمام قاضيه الطبيعي 

كلمة أخيرة للمجلس الأعلي للقوات المسلحة.. ان كنتم مؤمنون بهذه الثورة عن حق يجب ان يظهر هذا في تصرفاتكم وقرارتكم وتصريحاتكم..  السببـ الحقيقي وراء الدعوة للتتظاهر يوم 27 مايو لم تكن لتحقيق مجموعة المطالب التي رفعها الثوار ولكنهـا لاحساس عام بعدم ايمانكم بهذه الثورة.

  

من الأقوال المأثورة للشيخ محمد حسين يعقوب

في البداية دعوني اوضح اني من الذين كانوا مع رفض التعديلات الدستورية المقترحة في استفتاء 19 مارس ولكني لم احزن للنتيجة لأني كنت سعيد أكتر بنسب المشاركة ولأني مؤمن ان سبب الموافقة علي التعديلات لم يكن قوة التيار الديني الذي حشد الناس بالطرق المشروعة والغير مشروعة ولكن كان السبب الرئيسي اقتناع قطاع كبير من الشعب بأن نعم رمز للاستقرار ولا ستؤدي بالبلد الي الفوضي في ظل تعمد واضح من القوات المسلحة بعدم وضع خارطة طريق في حال رفضت التعديلات الدستورية

كان لا بد من هذه المقدمة قبل نشر هذا الفيديو لكي لا يتهمني احد بالتشاؤم واحباط الناس لأني اعتقد ان كل ما تكلم محمد حسين يعقوب وأمثاله كل ما فضحوا نفسهم وبان جهلهم وضعف حجتهم امام الناس

والآن للاقوال المأثورة التي ذكرت في هذا المقطع:

1 - قالت الصناديق للدين نعم (معلش يا بشمهندس شكلك كنت بتستفتي علي حاجة تانية.. احنا كان عندنا استفتاء علي مواد دستور وانتخابات ومجلس شعب ومادة 189 مقرر وملزمة ولا مش ملزمة.. انت كان عندكوا استفتاء علي ايه؟)

2 -اللي يقول بلد مانعرفش نعيش فيها.. انت حر ألف سلامة.. عندهم تأشيرات كندا وامريكا (متشكرين كلك ذوق والله.. اصلها كانت بلد خالتك)

3 - الشعب بيقول عاوز ايه؟ الشعب بيقول عاوز دين.. اديله دين.. واحنا بتوع الدين (عاوز مانجة ياخد مانجة.. عاوز فراولة ياخد فراولة)

4 - كل اللي قالوا لأ.. احنا مش زعلانين منهم.. بس عرفوا مقامهم (ولا احنا زعلانين منك والله.. ده انت عسل)

5 - شكلك وحش أما تبقي في الناحية اللي مش فيها المشايخ حتى لو كنت مقتنع ان الدستور ده في ستين داهية.. احنا الدستور هيعملنا ايه؟ (أنا عارف يا راجل.. دستور ايه اللي فالقينا بيه ده؟ سيبك منهم دي عالم تافهة.. خلينا احنا في الكلام الكبير اللي انت بتقوله؟)

6 - أما الشيخ يقولك آه تقول آه حتى لو علي خلاف هواك (قولهم يا سيدنا الشيخ.. أنا مش عارف ايه الناس اللي عايزة علي كبر يبقي ليها رأي وبتاع.. وانت رحت فين؟)

كلمة أخيرة: يا الله كم من الجرائم ترتكب باسمك

عندما يصبح شعار الحزب الوطني حقيقة: مصر بتتقدم بينا

مصر ٢٠٠٥

مصر ٢٠١١

خيرت الشاطر وتغييب الرأي العام

فؤجئت امبارح علي تويتر بنقاش حاد حول الدستور الفرنسي وإذا كان بـينص علي ديانة رئيس الجمهورية ولأ.. استغربت جدا نظرا لأن أي واحد عنده حبة ثقافة وقراله كلمتين في حياته هيبقي عارف ان فرنسا دولة علمانية ويتهمها البعض حتى بالتطرف العلماني وبيمنعوا كل الرموز الدينية في الاماكن العامة فمعقولة بعد كل ده ييجي الدستور ويحدد ديانة الرئيس؟

المهم حاولت استفسرعن سبب النقاش ده في الوقت ده بالذات فعرفت ان خيرت الشاطر النائب الاول لجماعة الاخوان المسلمين هو اللي افتى بكده في برنامج العاشرة مساء وقال ان الدستور الفرنسي بنص ان رئيس الجمهورية لازم يكون مسيحي الديانة وجم شباب الاخوان علي تويتر وأكدوا كلام الشاطر.. لأ وكمان زودوا حتى من عندهم وقالولك انه لازم يكون كاثوليكي

بصوا بقي انا من أول ما قامت الثورة وأنا ملتزم بقرار اتخذته مع نفسي بعدم انتقاد أي تيار سياسي مهما اختلف معه لأن أنا مؤمن ان احنا في فترة انتقالية ومش مرحلة نشر ايديولوجيات لكن ان قيادات الاخوان تطلع تنشر جهلها علي الناس في التليفزيون مستفيدين من اننا شعب لا يقرأ فمعلش بقي لأن الثورة دي ما قامتش علشان الناس تفضل تتساق زي البهايم وأما يطلع خيرت الشاطر حاجة تتاخد وكأنها قرآن لدرجة ان بعض شباب الاخوان كانوا رافضين المناقشة حتى بعد ما جبنلاهم النص الأصلي للدستور الفرنسي بالفرنساوي وبالانجليزي وكانوا يستندوا لمقالة عن الدستور الفرنسي أيام رفاعة الطهطاوي ومش بس كده ده فيه حد دخل وغيير في الصفحة بتاعة الانتخابات الرئاسية الفرنسية علي ويكيبيديا قبل حديث الشاطر.

أنا مازلت ملتزم بعدم الهجوم علي فكر حزب أو جماعة معينة في هذا التوقيت الحساس من تاريخ البلد واللي محتاج تعاون الجميع مهما كانت اختلفاتهم السياسية ولكن ده مش معناه عدم التصدي لمحاولات تغييب الرأي العام من أجل توصيل فكرة معينة للشعب تتبناها جماعة الاخوان وهي انه لا يجوز لقبطي أو امرأة بالترشيح لمنصب رئيس الجمهورية. ما لا يفهمه الاخوان ان مايتبنوه ليس رأي أو فكرة ممكن نناقشها لأنها بتتعارض مع احدي مباديء حقوق الانسان التي تنص علي المساواة بين البشر وعدم تمييز بينهم بسبب الجنس أو الأصل أو اللغة أو الدين أو العقيدة.

هو الجيش بيكروتنا ليه؟

رغم سعادتي باستقالة احمد شفيق رغم انه محترم ومهذب زي ما ناس كتير قالت.. يا عيني ال30 سنة بتوع مبارك خلوا الناس طموحاتها  ضعيفة.. كل اللي عاوزينه رئيس وزراء محترم ومهذب.. ما علينا مش دي القضية.. وفي رأيي أحمد شفيق ما كانش القضية برضه رغم انه كان لازم يمشي لأسباب سياسية بحتة ولكن احنا شعب اتحرم من ممارسة السياسة لمدة 30 سنة وعلشان كده شيء طبيعي ان تلاقي ناس كتيرة بتتعامل بعواطفها في المواقف اللي زي دي

استمرار المظاهرات في التحرير ما كانش من اجل رحيل حكومة شفيق فقط لكن كان فيه مجموعة مطالب و كان رحيل شفيق اقلهم اهمية.. لكن طبعا الاعلام و تعودنا علي شخصنة الأمور ادت الي نسيان كل هذه المطالب والتركيز علي مطلب واحد فقط

وفي رأيي ان اهم هذه المطالب هو الجدول الزمني المعد للفترة الانتقالية اللي كل الناس مجمعة ان عواقبه هتكون سيئة جدا وهتضيع كتير من أهداف الثورة الأساسية ورغم كده المجلس الأعلي للقوات المسلحة راكب دماغه ومصمم ينهي الفترة الانتقالية في 6 شهور واصبح الجدال نعمل البرلمانية الأول ولا الرئاسية رغم ان الحلين أزفت من بعض

أولا في حالة الانتخابات البرلمانية اتعملت قبل الرئاسية وده اللي مقترح من الجيش حتى الآن.. ده معناه ان هنعمل انتخابات مجلس شعب وشوري في يونيو يعني بعد 3 شهور.. ولغاية دلوقتي قانون الاحزاب ماتغيرش.. مين بقي اللي هيلحق ينظم صفوفه في اقل من 3 شهور ويبني أرضية في الشارع ده في حالة انه لحق يعمل حزب اساسا.. وده معناه ببساطة ان انتخابات زي دي هتسفر عن مجلس شعب من رجال الأعمال بتوع الحزب الوطني اللي ما اختارهمش احمد عز في الانتخابات المرة اللي فاتت وهينزلوا كمستقلين ومعاهم عدد مش قليل من الاخوان المسلمين لانهم القوة الوحيدة المنظمة في الشارع علي كام واحد وفد علي تجمع علي ناصري.. يعني من      الاخر هيجيلنا نفس المجلس تاني وبعديها بشهرين نعمل انتخابات رئاسية ويكسب عمرو موسي طبعا.. اوعي يكون فيه حد عنده شك في كده؟ كل اللي كانوا عاوزين الريس يكمل مدته وكل اللي كانوا عاوزين عمر سليمان يحكمنا وكل اللي كانوا عاوزين شفيق يعد.. وكل بتوع أنا اسف يا ريس.. كل دول هينتخبوا عمرو موسي علشان و طبعا اللي نعرفه احسن من اللي ما نعرفوش

ثانيا لوعملنا انتخابات الرئاسة الاول فديه ليها ميزة وهي ان الاحزاب هيبقي عندها وقت اطول شوية تحضر نفسها ولكن فيه مشكلة تانية وهي ان هيبقي عندنا رئيس منتخب من غير مجلس شعب يعني ما حدش بيراقبه... ده غير انه هيحكم بالدستور القديم اللي بيديله صلاحيات الهية.. . يعني فرعون تاني واحنا مش ناقصين

وللاسباب دي في رأيي المتواضع المشكلة مش في انهي انتخابـات الاول ولكن في التوقيت.. مفيش فترة انتقالية في التاريخ كانت 6 شهور وجت بنتيجة اجابية.. وبما ان الجيش مش عاوز يحكم أكتر من 6 شهور يبقي يعمل فترة انتقالية لمدة سنة علي الاقل بقيادة مجلس رئاسي من 3 أفراد.. 2 من المدنيين وواحد من الجيش.. زي ماناس كتير اقترحوا.. ويتم انتخاب لجنة تأسيسية لوضع دستور جديد مفيهوش 50% عمال وفلاحين والتهريج ده.. ويتم تغيير قانون الاحزاب علشان تبقي بالاخطار

الكلام ناس كتير بتقوله والمفروض الجيش يسمع الناس.. دي ثورتهم وهو موجود علشان يحميها وينفذ المطالب مش علشان يحكم 

عن الجدل المثار حول المادة الثانية من الدستور

لم أكتب شيئا منذ تنحي الرئيس السابق محمد حسني مبارك رغم وجود الكثير من ماأريد انا اقوله عن ما يعد في رأيي اعظم ثورة عرفها التاريخ ولكن سرعة تطور الاحداث ومحاولة البعض نشر الفرقة بين المصريين في هذا التوقيت الحرج من تاريخ الوطن دعاني للكتاب اليوم عن المادة التانية من الدستور التي تم حشرها من قبل البعض لتبدأ حملة من جانب الاسلاميين بالتحذير من المساس بها و حملة اخري من قبل الأقباط و العلمانيين من أجل الغاءها

وقبل ان تبدأ بالحكم علي هذا المقال قبل ان تقرأه يجب ان أوضح اني مؤمن بالعلمانية ايمانا شديد وأي متابع لهذه المدونة يعلم اني طالبت بالغاء هذه المادة مرارا وتكرارا نظرا لما تقوم به من التمييز الديني بين أبناء الوطن الواحد ولهذا كان شعار هذه المدونة التي يعلو صفحتها منذ ان تم انشاءها "هذه المدونة هي صوت لكل المصريين الذين يطالبون بتطبيق نظام ديمقراطي علماني في مصر يقوم علي التعددية الحزبية و يتبني الإعلان العالمي لحقوق الإنسان كمصدر رئيسي للتشريع"

ولكن ايمانا مني بأن هذا ليس وقت نشر ايديولوجيات, اطالب الجميع بوقف الحديث عن هذه المادة وتوحيد الصف حتى يتم تحقيق مطالب الثورة الأساسية و بعد ان يتم هذا وتنتهي هذه الفترة الانتقالية نبدأ حوار وطني لوضع دستور جديد للبلاد عبر جمعية تأسيسية منتخبة تناقش كل مواد الدستور بمن فيها المادة التانية من الدستور

كلمة أخيرة: قيام جريدة الأهرام التي لا يزال يرأس تحريرها اسامة سرايا بوضع هذا الاستفتاء علي هذه المادة في هذا التوقيت دليل ان نظام مبارك لسة صاحي وبيلعب

الشعب... خلاص... أسقط النظام

ده مش وقت كلام.. ده مش وقت تحليلات سياسية.. ده مش وقت نشر ايديولوجيات.. ده مش وقت تصفية حسابات.. ده وقت الاحتفال

مهما اتكلمت مش هقدر اعبر عني اللي جوايا.. أنا مش عاوز اخش أنام ألا يطلع ده حلم

من النهاردة البلد دي بلدك

محدش هيرمي زبالة في الشارع

محدش هيكسر اشارة مرور

محدش هيتدفع رشوة في مصلحة حكومية

محدش هيقبل ان ظابط بوليس يهينوا

محدش هيتحرش ببنت في الشارع

محدش هيرمي طوبة علي كنيسة

محدش هيفرط في كرامته

عاشت مصر حرة

عاشت مصر حرة

عاشت مصر حرة

عاشت مصر حرة

توضيح: الشعب يريد اسقاط نظام مبارك وليس حكومة نظيف

بقالي من امبارح قعد بتابع البرامج الحوارية والجرايد اللي بتعلق علي احداث انتفاضة الشعب العظيمة يوم 25 يناير.. لغاية دلوقتي مفيش مسئول كبير ولا مؤثر طلع وأتكلم وطبعا الراجل الكبير لسة مسمعناش صوته

لكن ده ما يمنعش ان رجال الحزب الوطني والصحفيين المحسوبين علي النظام الحاكم كان ليهم تواجد واضح علي الشاشات وصفحات الجرائد يحاولون تغييب الرأي العام.. اعداد المتظاهرين وانتشار المظاهرات في أنحاء الجمهورية خليت من الصعب ان الكلام يكون علي قلة مندسة أو مختلين عقليا زي ما كان بيحصل في المرات اللي فاتت

وما كانش قدام الناس دول غير الاعتراف بجدية المظاهرات وتأثيرها وان اللي حصل يوم 25 يناير مختلف عن اللي كان بيحصل قبل كده ولكن في نفس الوقت كانوا بيعملوا عملية تغييب للرأي العام تكمن في ايهام المشاهدين بإن المظاهرات تمت للتعبيرعن مطالب فئوية و ان دول ناس نزلوا الشارع لانهم عاطلين وعاوزين فرصة عمل أو ناس نازلة للاعتراض علي ارتفاع الاسعار.. و ان ده دور حكومة د.نظيف وان ده دليل علي فشلها وان في حالة استمرار الاحتجاجات قد يكون الحل في الاطاحة بالحكومة لتهدئة الجماهير 

 ورغم ان القضاء علي البطالة وتنفيذ حكم المحكمة بوضع حد ادني للاجور هي من مطالب يوم الغضب و لكن اختذاله فيهـا يعتبر التفاف قذر علي الحقيقة.. أنا أعرف ناس نزلت امبارح بتقبض في الشهر 5 و 6 و7 و10 ألاف جنيه.. أكيد دول مطالبهم مش فئوية

الحقيقة اللي لازم العالم كله يعرفها ان المصريين نزلوا يطالبوا بسقوط نظام الرئيس مبارك وليس سقوط حكومة  د.نظيف

والكل عارف الفرق في مصر ما بين النظام والحكومة.. حكومة د.نظيف بقالها 5 سنين ورغم ان الكلام ده هيزعل ناس كتير لكن هي في رأيي افضل من معظم الحكومات المتعاقبة في عصر مبارك و اللي فاكر ان رئيس الوزراء في مصر هو اللي بيختار وزير الداخلية ولا الخارجية ولا الدفاع ولا العدل أو حتى له كلمة عليهم.. يبقي شخص ساذج

حكومة د.نظيف حكومة خدمية ليس أكتر.. حكومة د.نظيف مش هي اللي اعلنت قانون الطوارئ من 30 سنة.. ولا هي اللي مصرة ما تعملش اصلاحات سياسية ولا هي اللي زورت الانتخابات ولا هي اللي مش عاوزة تعدل مواد الدستورعلشان يعود القضاء للاشراف علي الانتخابت وتحديد مدد الرئاسة بمدتين والسماح للرموز الشعبية بالترشيح ولا هي اللي مصممة علي قمع المعارضين وعدم اطلاق الحريات

اللي مصمم علي كل ده وبيعملوا من 30 سنة هو نظام الرئيس مبارك المتمثل بالدرجة الاكبر فيه هو شخصيا وفي قيادات حزبه القدامي امثال صفوت الشريف والجدد من امثال جمال مبارك و لجنة سياساته.. هما دول اللي نزل الشعب امبارح لاسقاطهم والاعتراض علي سياسهم أو أي كلام غير ده  يندرج تحت الدعارة السياسية

الشعب يريد اسقاط النظام

للي عايز يعرف اللي حصل امبارح في مصر ومين هي الناس اللي نزلت وايه مطالبهم يقرأ الرسالة دي من الراصد أحمد عبد الحميد

------------------------------------------------------------------


الشعب... يريد...إسقاط النظام

انا لسة راجع من المظاهرة، تعبان جدا و عندى برد من المية اللى رشوها علينا ، ده كله مش مهم ، اللى شفته لازم يتحكى ، و يتنقل بين الناس كمان.

انا مش هاكتب بالفصحى، مافيش حيل.

اللى شفته النهاردة كان سلسلة من المفاجآت العظيمة ، العظيمة بجد.

المفاجأة الاولى: عدد الناس كان كبير جدا زى ما شفتوا على التليفزيون ، كله كان فاكر انه رايح لوحده ، و الباقى كالعادة قاعد فى البيت ، بس لأ، مش ده اللى حصل.

المفاجأة التانية ان معظمهم شباب، و فرافير، بتوع الفيسبوك ، شكلهم يدل على راحة مادية نسبيا ، وناس كتير من مهن كتير، شفت زملاء فى الكلية ماشفتهمش من عشر سنين فى المظاهرة دى ، غريبة ان دول اللى نزلوا مع انهم فى معظم الاحوال مش مطحونين أوى زى بقية الناس.

المفاجأة الثالثة: على الرغم من ان معظم الناس شباب بس كان فيه كبار و ستات فى الخمسينات و ما شيين على مهلهم كده، و مش قليلين ، كتار، و كان فيه ناس ماشيين بولادهم.

المفاجأة الرابعة، كان فيه بنات معانا ، أو عشان أكون دقيق كانوا اكتر مننا فى الجروب بتاعنا ، و بنات فرافير من اللى تشوفهم فى الشارع تقول دول متربيين فى شرنقة دهب ، و مايعدوش الشارع لوحدهم ، بس ايه رجالة ، و جدعان ، بنات بس رجالة ، مش عارف ازاى.

المفاجأة الخامسة، كنا خايفين على البنات ان حد يتحرش بيهم ، ما حدش ، كله كان محترم ، و خايف عليهم اكتر مننا ، ده دليل ان التحرشات اللى بتحصل من مدسوسين من الداخلية.

المفاجأة السادسة: ما فيش عنف، خالص خالص ، و لما ناس بدأوا يهاجموا عربيات الامن المركزى اللى رشوا علينا مية، بدا كله يهتف: سلمية، سلمية ، سلمية.

المفاجأه السابعة: لما و صل الاعتصام التحرير و قعدنا فى التحرير، فيه ناس بعد كده بدأوا ينظفوا الميدان من المخلفات عشان الناس تعرف اننا متحضرين.

المفاجأة الثامنة: بصيت على الحتة اللى كنت فيها فى الميدان لقيتها نضفت فعلا!

المفاجأة التاسعة: بنت معانا ماكنتش اعرفها بتحلف بالمصحف و بالنبى عرفت انها مسيحية ، الغريب انه مابانش!!! ليه؟ عشان كلنا بنحب بلدنا و بنهتف عشان تبقى احسن ، فما بانتش الفروق الطفيفة دى.

المفاجأة العاشرة: مقدار النشوة و الفخرة و انت يتهتف باسم مصر باعلى صوتك "مصر...تصفيق قوى..مصر...تصفيق فوى"، البلد اللى المفروض انه وطنك، و بتحلم طول عمرك انك تعيش فيه بقية عمرك، من غير ما حد يتهمك أو تتهم نفسك بالعاطفية و الحمق ، أخيرا بتعلن انك بتحبه ، ومن غير خجل.

المش مفاجأة الحادية عشر: فى و سط الخوف و القلق من اللى ممكن يعمله الامن ، تبص للسما و تهتف مع عشرين أو تلاتين الف و تقول الله أكبر و ياااااااارب، و تطمن ، لانك نصرته ، فهو أكيد هاينصرك، وقد فعل و له الحمد و الشكر.

المفاجأة الثانية عشر: جميل منظر الناس و هم فى وسط ده كله يتجمعوا و يصلوا جماعة.

المفاجأة الثالثة عشر: شباب مصر شباب زى الفل، من غير مبالغة، و بكل ما فى الكلمة من معان: شهم، جدع، بيحب بلده، واعى و فاهم جدا ، وربنا فى قلبه.

المفاجأة الرابعة عشر: أقوى هتافات كانت بتجمع الناس كانت هى الموجهة لمبارك ، و النظام ، الشباب فاهمة أوى و عارفة فين المشكلة ، الهتافات التانية ماكانتش بتلاقى نفس الحماس.

المفاجأة اخامسة عشر: شفنا ابراهيم عيسى و الناس بتشيلوا على الاكتاف، و حبهم ليه ظاهر وواضح، و قابلت نوارة نجم، و سلمت عليها، و كانت مدمعة من الفرحة من جمال و بهاء اللى شايفاه، فعلا، المحترم محترم فى كل حاجة ، و اللى بيرضى ربنا مش نفسه، ربنا بيديله كتير ، كتير أوى.

المفاجأة السادسة عشر: احنا بفضل الله خيطنا الجيزة، و كل ما يحاولوا يوقفونا يلاقوا العدد كبير و يفتحوا، مصطفى محمود، شارع جامعة الدزل ذهابا و ايابا، البطل احمد عبد العزيز ، ميدان الدقى، ، شارع التحرير، الاوبرا، ميدان التحرير..

كتير كنت باحس انى خايف و مش عابز اتضر، بس مافبش خيار آخر، ده باطل و ظلم ، ولازم نحاربه، ربنا أمرنا اننا نحاربه ، لانه مش خالقنا اعتباطا، لو كان خالقنا عشان نعبده و نستمتع بنعمه، و خلاص، يبقى فين الفايدة ، ربنا خالقنا عشان نعمر الارض، و نستعمل نعمه فى ان احنا نحارب الظالمين و ننشر العدل، و هو قالنا من الاول ، عمرك و رزقك بايدى مش بايد حد تانى ، انطلق انت بأه ولا يهمك.

اكسر خوفك و انضم للي بيدافعوا عن الحق ، مسلمين أو مسيحيين، مش بتحلم ان ولادنا يكبروا فى وطن؟ يكون همهم اختراع كبير بيعملوه فى جامعة محترمة، أو كتاب معقد بيألفوه، بدل ما احنا مستهلكين فى العيشة و اللى عايشينها، و الشغل التافه اللى كلنا بنعمله، ايوه تافه، انت يا الا دكتور عارف انك اتعلمت اى كلام و بتوع بره احسن منك بمراحل او مهندس زيي ما يحلمش انه يعمل شىء معقد، كل اللى بيعمله اتعمل قبل كده خمسين مره مع فرق التفاصيل الغير مهمة، و لو عايز فلوس اشتغل فى البيع واللا التسويق ، أوتلاقيك بتعلم فى جامعة و عارف ان اللى بتعلمه مضى زمنه و حتى لو كان كورس كويس انت متأكد ان تلاميذك مش هايشتغلوا بربعه، لانهم هايتخرجوا يشتغلوا فى الكلام الفاضى اللى احنا بنشتغل فيه (ده لو اشتغلوا)، ما عندناش ناسا و لا هارفارد و لا كليفلاند و لا ام أى تى، انسى. انا لما بابص لابنى اللى عنده شهر بافكر لو ربيته كويس هل ينتهى زيى، مشغول بالقرف اللى بيحصل، و غالبا هاينضم لاى حركة، عشان يطلع الغل اللى جواه، و الله أعلم ايه اللى هايحصله، يا الا اربيه أى كلام فيطلع حرامى أو حزب وطنى، يا الا يسافر و اشوفه كل سنة مرة ، يا الا اتكل على الله و احاول انى اصلحله البلد.

الاخبار ان الامن فض الناس فى ميدان التحرير، ما اعرفش ايه اللى هايحصل بكره أو بعده أو بعد شهر، الناس دى زينا ، بيتظاهروا عشان الظلم بيوجع ، و بيئلم، فيه ناس ماتت ، و فيه ناس اعتقلت و لسة هايكملوا ، عشان الحرية و الكرامة طعمهم جميييييييييييييييل ، روح خليك معاهم، خليك مع الحق ، سواء فى ميدان التحرير، أو فى أى حته فى المستقبل، ما تنساش ان كله بايد رب العالمين، رزقك و صحتك و عمرك، و لو ما كانش اللى ماتوا فى المظاهرات ماتوا شهداء النهاردة، كانوا برضه هايموتوا فى نفس المعاد فى حادثة هابلة، أو أى حاجة من الحاجات اللى بتموت الناس فى مصر لاتفه الاسباب.

المفاجأة الاخيرة، نسيت أقولها معلش: مصر بلد محترمة شعبها حى و بينتفض عشان كرامته، و ظهر على الجزيرة أخيرا و هو بيصرخ و يقول ،وش كده من غير لف ولا دوران: الشعب...يريد...اسقاااط النظام.

وده طعم الحرية و الكرامة

صباح الورد اللي فتح في جناين مصر

صورة أقوي من ١٠٠٠ تعليق

لماذا تونس؟

أولاً تحية للشعب التونسي العظيم الذي اثبت ان التخلص من حاكم ديكتاتوري بقي في الحكم أكتر من 20 سنة ليس من وهج الخيال ولكن شيء بالامكان تحقيقه بالشعب وحده وبدون قيادات معارضة تاريخية مثل التي رزقنا بها الله
حالة السعادة اللي اصابت جميع الشعوب العربية تستحق الدراسة.. فالمنطقة العربية هي المنطقة الوحيدة في العالم اللي لم تشهد ثورات شعبية في تاريخها و كل ثوراتها ما هي في الحقيقة الا انقلابات عسكرية اسقطت مستبد ووضعت مكانه مستبد اخر و لهذا اصبحت التجربة التونسية فريدة من نوعها وملهمة لجميع الشعوب العربية التي سئمت هذه الأنظمة الديكتاتورية الفاسدة


لكن اذا كنا نحلم بتكرار التجربة فعلينا ان نسأل انفسنا لماذا تونس؟
لماذا تونس بالذات التي قرر شعبها ان يقول لا ويطيح برئيسه خارج البلاد؟ لماذا تونس وليست مصر أو الجزائر أو اليمن؟ هل لأن الوضع في تونس أسوأ من كل هذه البلدان؟


من المعروف ان تونس من اكثر البلاد العربية تقدماً في جميع المجالات وحالتها الاقتصادية افضل كثيراً من جيرانها و الارقام تؤكد ذلك فطبقاً لاحصائيات الامم المتحدة دخل الفرد في مصر 2030$ سنوياً مقارنةً ب 3875$ في تونس أي ان المواطن التونسي دخله  تقريباً ضعف دخل المواطن المصري و ان سألت أي  شخص زار البلدين فسيقول لك ان الوضع في تونس افضل بمراحل بما هو عليه في مصر


اذن لا يمكن ان يكون الوضع الاقتصادي العامل الوحيد في قيام الثورات ولكن في رأيي ان العامل الاهم هو ان يكون لدي المواطن احساس داخلي بالحرية و أن يكون عقله ملكه وحده لكي يستطيع اتخاذ القرار بالنزول للشارع والمطالبة بحقوقه المسلوبة

:ليحدث ذلك لا بد من تواجد عاملين أساسيين

١- التعليم

يعرف عن المجتمع التونسي انه اكثر المجتمعات العربية تعليماً فنسبة الأمية للشباب بين سن ال14 و ال25 عاماً لا تتعدي ال3% في حين تتعدي هذه النسبة ال16% في بلد مثل مصر و ال20% في بلاد عربية اخري. ولا يكتفي التونسيين بتعلم القراءة والكتابة فقط لكي يخرجوا من دائرة الأمية ولكن نسبة من يدخلون الجامعة و من يحصلون علي شهادات الماجستير والدكتوراه هي الاعلي ما بين الدول العربية. اضف الي ذلك ان الانفاق الحكومي علي التعليم في تونس ضعف ما هو عليه في مصر طبقاً لأرقام منظمة اليونسكو

لكي يستطيع الشعب ان يثور.. يجب ان يكون لديه الحد الادني من التعليم ليصبح لديه الوعي الكافي بأن حقوقه مسلوبة وان لا بد له ان يطالب بها

٢- التخلص من سلطة رجال الدين

احدي اهم مقومات المجتمع التونسي هو نجاحه في ال50 سنة الماضية من التخلص من سلطة رجال الدين وتحكمهم في عقول     المواطنين. فالمجتمع التونسي نجح في الفصل ما بين الدين و السياسة. ولا يجود شيوخ  يدعون المواطنين لطاعة الحاكم حتى ان كان ظالم ومستبد  استنادا إلي "يا أيها الذين آمنوا أطيعوا الله وأطيعوا الرسول وأولي الأمر منكم" ولا يوجد قسس يدعون لترشيح الرئيس لفترة حكم سادسة ويمنعون شعبهم من التظاهر ضد النظام مرتكزين علي "اعطى مالقيصر لقيصر وما لله لله"

المجتمع التونسي تحرر لأنه تحرر داخليا في المقام الأول عندما امن بالتعليم و بالتخلص من سلطة رجال الدين ولهذا طوال ال30 عاما الماضية لم يفعل مبارك شيئا لاصلاح التعليم و ترك السلفيين من ناحية ورجال الكنيسة من ناحية اخري تتحكم في عقول الوطن.

ان كنا نريد ان نتحرر من نظام مبارك فيجب علينا ان نتحرر داخلياً أولاً

ما بين حادث كنيسة القديسين و حادث أريزونا

اتفرجت امبارح علي خطاب الرئيس اوباما في ذكري 6 مواطنين امريكان تم قتلهم الاسبوع اللي فات في ولاية اريزونا أثناء تجمعهم حول نائبتهم بالكونجرس اللي افلتت من al باعجوبة. مش عارف ليه و أنا قاعد بتفرج علي الخطاب كان عمال ييجي علي بالي خطاب الرئيس مبارك بعد حادث كنيسة القديسين. الحادثتين بشعين وحصلوا في نفس الاسبوع ومات فيهم ناس ماتستاهلش انها تموت.. الحاجة الوحيدة المختلفة كانت الخطاب.. الفرق بين الخطابين يلخص ببساطة الفرق بين الدولتين.

شوفوا الخطابين كاملين هتعرفوا ليه هما وصلوا للي وصلوله واحنا..... 

خطاب الرئيس مبارك

خطاب الرئيس اوباما

طبعا مش هتكلم عن الفرق في التون بين الخطابين و لا هتكلم عن مكياج الريس و خلينا نتكلم عن المضمون اللي كان في الخطابين

تركيز اوباما علي الكلام علي كل شخص من اللي ماتوا.. عن حياته الخاصة.. عن عائلته.. عن هواياته.. تأكيد علي قيمة الانسان و دور كل فرد واهميته في المجتمع الأمريكي.. في الوقت اللي كان خطاب مبارك هدفه تسجيل موقف سياسي فقط لا غير يتم اذاعته للعالم كله للتأكيد ان النظام المصري يقف ضد الارهاب.. أما اللي ماتوا دول فهم في النهاية عدد مش أكتر

و في الوقت اللي جاء خطاب اوباما بعد أسبوع كامل من حادث اريزونا فانه رفض فيه توجيه الاتهام لجهة معينة وساب الموضوع للناس اللي شغلتها انها تحقق علشان تعرف الأسباب اللي ادت لارتكاب الجريمة.. أما مبارك فرغم ان خطابه جه بعد ساعات من تنفيذ الجريمة ورغم انه زهقنا بالكلام عن ان مصر دولة مؤسسات.. لكنه كان قرر ان فيه أصابع خارجية وراء الموضوع و اصدر حكمه من غير ما يستني ويشوف التحقيقات هتسفر عن ايه

خلاصة الكلام ان أما يكون فيه احساس عام في المجتمع انه فيه حد ادني من العدل وانه جميع أفراد الشعب متساويين في الحقوق والواجبات بيتم استغلال المصايب اللي زي دي من اجل توحيد الشعب لكن أما يكون الشعب مش حاسس بده فمن الطبيعي ان أي حادث بـيزود الاحتقان والغضب.. وحتى لو كان حادث الاسكندرية كان له تأثير ايجابي بعض الشيء في العلاقات بين المسيحيين والمسلمين في مصر فده حصل بفضل مبادرات شعبية ما كانش للنظام الحاكم أي دور فيها.. بالعكس في الوقت اللي كان المسلمين والمسيحيين بيتظاهروا جنب الي جنب للتعبير عن رفضهم للي حصل كان النظام بيقبض علي الناس و بالاخص المسلمين وكأنه بيقول للشعب ان التضامن مرفوض.. وفي الوقت اللي كان مسلمين كتير بيحاولوا يدخلوا الكنايس علشان يعيدوا مع الاقباط كانوا ظباط النظام بيمنعهوهم.

كنيسة القديسين و تحويل الغضب إلي الاتجاه الصحيح

لن أكتب عن ماحدث في كنيسة القديسين بالاسكندرية التي كانت في يوم من الأيام مدينة يتعايش فيها البشر من جميع الأجناس و العرقيات والاديان ليأتي اليوم التي تصبح فيها مسرحاً لمجزرة كانت تستهدف ارواح بشر كانت جريمتهم الوحيدة انهم ذهبوا للصلاة في بيت الرب

لن أعلق علي الجريمة لأني سئمت تكرار نفس الكلام بعد كل حادثة يتعرض لها المسيحيين في مصر

أكتب اليوم عن المظاهرات التي ملئت مصر بطولها و عرضها للتنديد بما حدث.. لا انكر سعادتي بأن الأقباط -  الفئة التي طالما عايرناها بالسلبية وعدم السعي في المطالبة بحقوقها المهدورة - قد تحركت للمرة الأولي وخرجت من أسوار الكنيسة لتعلن غضبها

ولكن للأسف أري ان بعض هذه المظاهرات قد اخطأت الاتجاه باستخدام شعارات تشوبها رائحة الطائفية و استخدام عنف نتج عن تكسير السيارات والممتلكات العامة وقطع الطرق. علي المواطنين الغاضبين - والذين يجب تفهم غضبهم وليس بالامكان توجيه اللوم لهم - ان يفهموا ان معركتهم ليست مع المسلمين أو الاسلام أو اخوانهم في الوطن.. ومن الضروري ان يتم توجيه هذه الشحنة الغاضبة في الاتجاه الصحيح

وجهوا غضبكم إلي نظام حسني مبارك الذي  ضغط علي الكنيسة طوال 30 عاماً بعدم المطالبة بحقوقكم و القبول بالفتات بحجة انه الوحيد القادر علي حمايتكم

وجهوا غضبكم إلي هذا النظام  الذي فرض قانون الطوارئ طوال 30 عاماً بحجة الحفاظ علي الأمن و الأمان ولكنه لم يستخدمه الا للبطش بالمعارضين والقبض علي النشطاء السياسيين و تتبع المدونين وترك كنائسكم وبيوتكم ومحلاتكم بلا ادني حماية

وجهوا غضبكم الي هذا النظام الذي نشر الفقر والجهل بين المواطنين حتى اصبح نمو الارهاب بيننا من اسهل ما يكون

وجهوا غضبكم إلي هذا النظام الذي سمح لامثال زغلول النجار وسليم العوا ومحمد عمارة وغيرهم  بأن يصبحوا رموز لهذا البلد تفرد لهم صفحات الجرائد و تفتح لهم القنوات التلفزيونية أبوابها

وجهوا غضبكم في الاتجاه الصحيح ولو لمرة

عاشت مصر حرة مستقرة

نزل عليا خبر فوز الدكتور فتحي سرور برئاسة مجلس الشعب بأغلبية 505 صوت مقابل صوت واحد لمنافسه  محمد عبد العال كالصاعقة..  كيف لهذا المجلس الموقر ان يسمح بشيء كهذا؟ كيف حدثت هذه المهزلة من دون تدخل واضح و صريح للنظام  ليعيد الأمور لنصابهـا.. كيف لنا ان نسمح بأن يخسر الدكتور سرور صوتاًا كاملاً في التصويت لرئاسته لمجلس الشعب.. فبعد ان خدم الرجل المجلس برئاسته لمدة 19 سنة كاملة.. تكون هذه طريقة النواب في رد الجميل؟ الا يخجل النائب الذي لم  يعطي صوته لدكتور سرور؟ ألا يعلم أفضال الرجل علي هذا البلد؟ 

يجب علي الشعب المصري ان يقف وقفة صريحة و قوية امام ما حدث..  و ان لم يتحرك الشعب فلا يلومن الا نفسه..  فالايام تمر سريعاً وقد نجد انفسنا أمام انتخابات 2015 و يخسر الدكتور سرور صوتين.. تخيل معي لو حدثت يوماً هذه المأساة.. ماذا سنفعل؟  .. ولهذا يجب التحرك قبل فوات الأوان.. يجب انقاذ البلد واعادة بناء قيم وتقاليد المجتمع المصري الذي عرفناه, المصري الحقيقي أصيل و ليس ناكراً للجميل

اعلم ان وسائل الاعلام قد تناقلت الخبر وادعت ان محمد عبد العال المرشح لرئاسة البرلمان ضد الدكتور سرور هو من اعطي صوته لنفسه ولكن وفقاً لما نعرفه عن المدعو محمد عبد العال.. فاني اؤكد ان محمد عبد العال رجل من نبت هذه الأرض الطيبة كما صرح الاستاذ صفوت الشريف وان من شرب من مياه النيل لا يمكن له ان يخون الحزب الوطني الذي مد يده اليه في يوم من الايام .. من هنا اعلنهـا ان محمد عبد العال ليس ناكراً للجميل و من المستحيل ان يبيع من اتي به إلي مجلس الشعب واهداه حصانته و لهذا فرغم ترشحه الا انه اعطي صوته للدكتور سرور متخذاً احمد الصباحي مثلاً اعلي له بعدما ترشح لانتخابات الرئاسة 2005 ولكنه اعلن انه سوف يعطي صوته لوالد المصريين الرئيس مبارك

هذه هي مصر التي نعرفها ولهذا اطالب مجلس الشعب بمساعدة المخابرات ووزارة الداخلية بتحديد النائب عديم الانتماء الذي ادلي بصوته لغير الدكتور سرور و تقديمه لمحاكمة عاجلة ليكون عبرة لغيره من المواطنين 

وعاشت مصر حرة مستقرة

عن المهزلة الإنتخابية

لن ادخل هنا في حوار عن شرعية مجلس الشعب القادم من عدمها.. فالمسألة ليست محل نقاش كما يحاول ان يسوق الحزب الوطني  وقياداته علي ان الحقيقة تختلف من منظور الي اخر. فالحقيقة ان الجميع يري ان هذه الانتخابات هي انتخابات مزورة بكل ماتحملها  الكلمة من معني.. وعندما اقول الجميع فأعني احزاب المعارضة وجماعة الاخوان المسلمين و جميع التيارات السياسية من أول الجمعية الوطنية للتغيير لشباب 6 ابريل وجميع منظمات المجتمع المدني وحقوق الانسان المراقبة للعملية الانتخابية و جميع تقارير الصحف الاجنبية بالاضافة الي الحكومات الاجنبية التي أعربت عن خيبة عملها لما شهدتها من تجاوزات. اذن هذا رأي الجميع في الوقت التي يري الحزب الوطني وحده ان مصر شهدت عرس ديمقراطي و ان الانتخابات كانت نزيهة و شفافة وعادلة

اعتذر عن المقدمة الطويلة ولكن كان يجب توضيح الأمر حتى لا يخيل للبعض اننا نعرض وجهة نظر واحدة وليس الاخري لأن ببساطة لا توجد وجهات نظر مختلفة عندما نتكلم عن سيرعملية إنتخابية. فلإنتخابات في العالم كله نزيهة أو غير نزيهة وفي الحالة التي امامنا هي لم تكن نزيهة.

و لكن هذا ليس بجديد فلم تشهد مصر انتخابات حقيقية منذ قيام ثورة يوليو ولكن كان المصريون يأملون ان تكون هذه الانتخابات هي علي الاقل خطوة إلي الأمام بالمقارنة بالانتخابات الماضية. و لكن بمقارنة بسيطة يتضح اننا رجعنا عشر خطوات إلى الوراء.   

انتخابات 2005 رغم كل ما شهدتها من احداث عنف و منع المواطنين من الوصول الي لجنتهم و اغلاق اللجان لساعات طويلة و عمليات شراء الأصوات لكن كان علي الأقل اذا نجح الناخب في الوصول الي صندوق الانتخابات كان هناك قاضي يحمي الصندوق ويحمي معه صوت الناخب. و الدليل علي ذلك ان في 2005, حصل الاخوان المسلمين علي 20% من المقاعد و لم يستطع الحزب الوطني في الحصول علي اكثر من 39% من المقاعد و وصلت النسبة 73% بعد ضم المستقلين الفائزين.

أما انتخابات 2010 فلم تجري تحت إشراف قضائي بعد ان قام الحزب الوطني بتعديل الدستور من اجل هذا الغرض و كان الاشراف هذه المرة لوزارة الداخلية ولأشخاص تابعين للنظام و جرت عمليات التسويد التي كنا نسيناها في 2005. وكانت النتيجة حصول الحزب الوطني علي 87% من المقاعد ستزيد الي 96% في حالة ضمه للمستقلين كما كان يفعل سابقا.. أما جماعة الاخوان المسلمين فلم تحصل علي أي مقعد.

هل من الممكن ان تكون شعبية الحزب الوطني زادت في ال5 سنوات الماضية من 39% عالي 87%.. هل من المعقول ان الاخوان لم يصبح لهم وجود في الشارع؟ 

علي المعارضة المصرية ان تبتعد عن صراعاتها الداخلية ومصالح أفرادها الشخصية وان تتخذ قرار شجاعا لمرة واحدة بعد خوض أي انتخابات مستقبلية حتى يتم تعديل الدستور بحيث تكون هناك ضمانات واضحة لنزاهة الانتخابات.

الاصرار علي المشاركة في ظل الأوضاع الراهنة لا يمكن وصفه الا بالغباء السياسي.