نظام فقد مصداقيته

أنا مش هعلق علي خبر الكشف عن خلية تابعة لحزب الله تحضر لأعمال ارهابية تخريبية علي الأراضي المصرية.. لأني مؤمن ان الكلمة في الموضوع ده هي للقضاء فقط.. التحقيقات لسة في أولها و القضية مش باين لسة اذا هي فعلاً قضية جنائية و لا مجرد قضية سياسية.. القضاء بس اللي هيحدد اذا فعلاً الناس دي كانت بس بتهرب سلاح لغزة و لا فعلاً كانوا ناويين يفجروا و يخربوا في البلد.. و لكن طبعاً لازم أقول ان حتي لو طلعت القضية سياسية و طلع مفيش ارهاب و لا حاجة و الموضوع كله كام حتة سلاح كانوا هيبعتوها لحماس في غزة.. فده ما يقللش من الخطأ اللي وقع فيه حزب الله بخرق السيادة المصرية و استخدام أراضيها لأعمال غير قانونية و من دون علم القيادة..

لكن الحاجة اللي فعلاً طلعت بيها من القضية دي كلها هو ان النظام المصري فقد مصداقيته تماماً عند هذا الشعب.. بصراحة معظم الناس و أنا منهم اتصدمت أما اعترف حسن نصرالله ان الواد الممسوك ده فعلاًَ من عنده و انه كان في مصر في مهمة معينة.. يعني أنا مش بس ما كنتش مصدق حتة انهم كانوا هيعملوا أعمال ارهابية.. لأ أنا ما كنتش مصدق أصلاً ان اللي ممسوك ده له أي علاقة بحزب الله و كنت فاكران الموضوع ملفق تماماً لأغراض سياسية و ده رغم اني مش من المؤيدين لحزب الله و لا من المتيمين بحسن نصر الله.. لكن السبب الحقيقي ان النظام ده بقاله ٣٠ سنة بيكدب علينا لدرجة اننا ما أتعودناش منه غير علي التلفيق.. و للأسف انه حتي لو جه النهاردة يقولنا حاجة حقيقية محدش هيصدقه