احنا أحسن ناس تتابع انتخابات

العالم كله مقطع بعضه في الإنتخابات و احنا أعدين بنتابع و نحلل

في لبنان و رغم طائفية النظام الإنتخابي، أثبت اللبنانيون أن بإمكان العرب أن يصوتوا في انتخابات حرة و نزيهة و أن يعترف الخاسر بالهزيمة و إن يوعد الفائز انه سيتعاون مع كل القوة الوطنية من أجل مصلحة البلد

المصريين تابعوا الإنتخابات اللبنانية بمنتهي الإهتمام و الناس كانت أعدة بتحلل و تحسب لو ميشيل عون كسب في الأشرفية هيبقي ايه الوضع و لو تيار المستقبل اخد مقاعد بيروت ايه اللي هيحصل لإنهم عارفين انها انتخابات هتكون نتائجها متقاربة و هي اللي هتحدد مصير لبنان في السنوات القادمة

بعديها بشوية ابتديت الإنتخابات الإيرانية اللي بردو رغم نظامها الإسلامي و لكن انتخاباتها تتمتع بنزاهة و يحدد نتائجها الشعب الإيراني علي حسب توجهاته، و بردو كمصريين اهتمينا و تابعنا و حللنا و شوفنا ٨٠٪ من الإيرانيين بيدلوا بأصواتهم و شوفنا ٢ مرشحين بأفكار و أديولوجيات مختلفة بيعرضوا برامجهم علي الشعب في مناظرات تلفيزيوينية و بعديها شوفنا مظاهرات مليونية لأنصار موسوي اعتراضاً علي نتائج الإنتخابات و تشكيكاً في صحتها

كل ده كان بيحصل و احنا بالصلاة علي النبي أعدين أدام الفضائيات بنتابع و نتناقش و نتحاور و نحلل و اللي بيساند أحمدي نجاد و اللي نفسه موسوي يكسب.. اللي متعاطف مع حسن نصر الله و اللي بيحب سعد الحريري. المهم سألت نفسي هو احنا ليه بنحب نتابع الإنتخابات قوي كده؟ و ملقتش اجابة غير انها عقدة نقص.. لأننا عمرنا ما كانت عندنا انتخابات فيها تنافس ما بين فريقين عندهم نفس فرص الفوز.. عمرنا ما كان عندنا برنامجين مختلفين ننقي منهم علشان نختار مستقبل بلدنا.. عمرنا ما نزلنا الشارع علشان نعترض علي تزوير الإنتخابات في ال٥٠ سنة اللي فاتت

علشان كدة بنعد نتفرج علي الإنتخابات البلاد اللي حولينا زي بالظبط ما بنتابع ماتشات الدوري الأسباني و الإنجليزي علشان عارفين ان عمرنا ما هنقدر نتفرج علي ماتشات كده في الدوري التعبان بتاعنا