فريدة جمال مبارك أول حفيدة للرئيس مبارك ولدت في العاصمة البريطانية لندن الأسبوع الماضي
و السؤال اللي ماحدش بيسأله و لا في الجرايد و لا في البرامج الحوارية هو ليه بنت جمال مبارك تتولد في لندن؟
و أعتقد ان ده سؤال من حق الشعب المصري أن يسأله.. و لو كنا في أي بلد محترمة.. كان المفروض الأستاذ جمال بما انه شخصية عامة و أمين لجنة السياسات في الحزب الحاكم و مرشح محتمل للرئاسة يطلع يشرحلنا ليه قرر ان بنته تتولد في لندن و مش في مصر
يعني أما الرئيس راح يعمل عملية المرارة في ألمانيا.. قالولنا أصل دي أحسن مستشفي في العالم بتعمل العملية دي.. و رغم ان ده يعتبر اعتراف ضمني من الرئيس مبارك و النظام بأكمله في الفشل في اصلاح المنظومة الصحية في مصر طوال ال٣٠ سنة اللي فاتوا.. و لكنها مبلوعة.. يعني اذا كان المواطن العادي اللي معاه شوية فلوس بيطلع يتعالج برة.. فمينفعش رئيس الجمهورية يحصل علي رعاية طبية أقل.. و خصوصاً ان كل مرض و بيبقي له الدولة المتخصصة فيه.. يعني مثلاً معروف ان أي حد عنده السرطان بيروح فرنسا و دلقوتيعرفنا انه أي حد عنده المرارة بيروح ألمانيا
لكن في حالة الولادة الموضوع يختلف.. بمعني ان عملية الولادة عملية بسيطة مش محتاجة انك تروحلها لندن و لو كانت البنت اتولدت في دار الفؤاد ما كانتش هتفرق كتير.. معني كده ان فيه سبب تاني وراء ان البنت تتولد في انجلترا و هو انها تحصل علي الجنسية الإنجليزية و ده بقي اجراء متبع من كتير من العائلات المصرية الميسورة الحال اللي شايفة ان البلد مستقبلها غامض و مش باينله معالم و ان الباسبور المصري ده مالوش أي مزايا فلو جاتلهم الفرصة بيروحوا يولدوا في أمريكا و لا انجلترا و لا كندا علشان ولادهم ياخدوا الجنسية
طيب.. أما الناس دول يعملوا كده.. محدش يقدر يلومهم لأن فعلاً البلد مش باينلها صاحب و حالتها بتسوء يوم بعد التاني... لكن أما ابن رئيس الجمهورية و اللي عاوز يبقي رئيس جمهورية ياخد مراته و يخليها تخلف في لندن علشان يأمنوا لبنتهم مستقبلها.. ده يبقي معناه ايه؟ مش لاقي تفسير غير ان هما نفسهم شايفين ان البلد مفيش منها رجاء و ان الجنسية المصري دي لا بتودي و لا بتجيب و بيعملوا نفس اللي احنا بنعمله بالظبط... و بعدين يطلعوا في مؤتمراتهم يطلبوا مننا نكون متفائلين و ان بفضل مجهوداتهم و سياساتهم هنتنغنغ نغنغة و نقلبها درمغة
بس بردو الغلط مش عليهم.. الغلطان هو اللي ناس تحكمه و هما نفسهم مش مؤمنين بالبلد
Posts
20 comments:
انا لما عرفت الموضوع ده جالي صداع نصفي وضغطي وطي
اصلها حتى ما ولدتش في المانيا مكان ماهي
لا ألمانيا ايه؟
لازم تبقي انجليزية زي بابا و عمو و تيتة
و بعدين يهاجموا البرادعي علشان ايه عنده جنسية سويدي
حاجة وسخة
مش يمكن بيجهز نفسه لو خسر الانتخابات والاخوان مسكوا الحكم ؟
;)
هاهاهاهاهاهاهاهاهاها
هم يضحك و هم يبكي
و انا اللي عمل فيها وطني ورفضت الجنسية الانجليزية مع اني عشت في انجلترا نص عمري
من غير لماذا يا عم مينا
اهو كده وخلاااااااص
Kaka
هاها طب والله خير.. أصل معني انه خايف لا الأخوان يكسبوا لاإنتخابات يبقي احتمال نشوف انتخابات بجد في يوم من الأيام
Anonymous
واضح ان ده مش زمن الوطنية.. احنا في زمن جمال مبارك
Ms Venus
والله معاكي حق.. أنا الغلطان هاها
يا عم مينا
أولا، آسف للإطالة، سأقول ما أريده على دفعتين بسبب الحد الأقصى لعدد الحروف
ثانيا، إنطباعي من قراءة كلامك إن فيه شيء في نفسك ضد حكومة الرئيس مبارك والحزب الوطني الديموقراطي. عادي مش مشكلة
حضرتك بتقول إن كون الريس يروح ألمانيا يتعالج إن ده إعتراف إن الريس والنظام فشلوا خلال 30 سنة أنهم يصلحوا المنظومة الصحية في مصر. إسمحلي أختلف معاك. مش يمكن المستشفى إللي الريس راح يتعالج فيه ده هو الأفضل على مستوى العالم في علاج الحالة المعينة إللي كان الريس مصاب بيها، وفي الحالة دي يبقى طبيعي إن رئيس دولة يختار المكان ده لعلاج الحالة دي. وبعدين الريس ما راحش إنجلترا أو كندا أو فرنسا مثلا. هل ده معناه إن حكومات إنجلترا وفرنسا وكندا فشلت في توفير منظومة صحية ملائمة؟ وبعدين تعداد مصر سنة 1981 كان حوالي 40 مليون، وفي سنة 2010 قربنا على 80 مليون، يعني عدد السكان تضاعف خلال 30 سنة. تقدر تقولي منين الحكومة تجيب موارد لتوفير وتطوير الرعاية الصحية للأعداد الغفيرة دي؟ ده طبعا غير مصاريف التعليم إللي عايزينه مجاني، والمواصلات، والشوارع، ودعم السلع الأساسية، ودعم البنزين، وتوفير الغاز الطبيعي، وغيره وغيره وغيره
إزاي بقى الشعب يطلب كل ده مع وجود الزيادة السكانية الرهيبة إللي بتأكل أي تقدم وأي تطوير وأي موارد جديدة؟ وازاي الآباء والأمهات يطلبوا من الحكومة توفير كل الخدمات دي للمواليد الجدد، في حين أن الأب والأم نفسهم مافكروش قبل ما يخلفوا إزاي يتحملوا مسئولية الطفل الجديد وإزاي يصرفوا عليه. ليه بقى نحمل الحكومة والرئيس المسئولية إذا لم يتحملها الآباء والأمهات، يعني الشعب نفسه؟
في الجزئية دي إنت رجعت وأديت مثال السرطان وفرنسا، وقلت إن حكاية إن الريس يتعالج في ألمانيا دي مبلوعة. إسمحلي أقولك بناء على كلامي السابق إنها مش بس مبلوعة، لأ، دي مبلوعة ومهضومة ومشخوخة 1000 مرة
نيجي لموضوع الولادة بقى. إنت بتسأل، ليه فريدة جمال مبارك تتولد في لندن؟ أقولك أنا ليه! عشان أبو فريدة وأم فريدة زي كتير من الأسر في مصر خايفين على مستقبل بنتهم. في ناس بتهاجر عشان ولادها وبناتها يعيشوا حياة أفضل، وفيه ناس بتولد برة عشان خاطر ولادهم وبناتهم يبقى ليهم مستقبل ويقدروا يختاروا يعيشوا فين لما يكبروا. إنت بتبص لجمال على إنه إبن الرئيس وإنه هو المرشح القادم كمان. طب بصله على إنه أب خايف على بنته ومش عارف البلد دي هتكون فين بعد 30 أو 50 سنة. أب عادي يا أخي مش ضامن المستقبل شكله إيه. أب زي أي أب بيتمنى الأفضل لعياله
إنما إنت بتفسرها على إنهم مش مؤمنين بالبلد. طيب قوللي لو سمحت، هي البلد عبارة عن إيه؟ مش البلد دي هي الشعب نفسه؟
ولما يكون الشعب مهمته الأساسية الجواز والخلف ويقعد على القواهي والمدونات يطالب الحكومة بتوفير التعليم المجاني والرعاية الصحية المجانية والمواصلات والشوارع المرصوفة ودعم السلع الأساسية ودعم البنزين وتوفير الغاز الطبيعي، وكأن الحكومة مهمتها الأساسية هي طبع الفلوس وشراء السلع وتوصيل الطلبات لمنازل المواطنين مجانا... ولما الشعب ده يطلب من الحكومة المساواة وحرية الاعتقاد والعدل والحرية والديموقراطية والمهلبية و و و، لما يكون الشعب ده نفسه لا يمارس أي من هذه القيم في حياته الشخصية والمهنية والعائلية والفردية، ولما يكون الشعب نفسه أكثر ديكتاتورية من الحكومة في إدارة شؤون حياته، يبقى بعد كل ده، ليه المواطن المصري جمال مبارك والمواطنة المصرية خديجة الجمل يكون عندهم إيمان بالشعب ومستقبل البلد؟ مش بس مبارك وخديجة. ليه أي إتنين بيفكروا في مصر ومستقبلها يكون عندهم إيمان بالشعب ومستقبل البلد، وإحساس بالأمان تجاه مستقبل أطفالهم؟
يُتبع
إستكمال لما سبق
وبعدين حكاية إن جمال هو المرشح القادم دي بصراحة بقت مملة قوي. الحزب الوطني لم يقرر من هو المرشح القادم في 2011. وجمال مبارك نفسه لم يقول أنه بيفكر يكون رئيس مصر القادم. إنما إنت عارف مين إللي اخترع الموضوع ده؟ جماعات وأحزاب المعارضة هي إللي بدأت الإشاعة، لأنها أرادت أن يكون لها القدرة على أن تحشد الجماهير حول قضية لها شعبية، وطبعا الناس في مصر بتصدق أي إشاعة عن أي مؤامرة من الحكومة الوحشة الشريرة، فالمعارضة إختارت قضية وهمية وهي ترشيح جمال مبارك للرئاسة بعد أن فشلت في تحقيق مكاسب لها قيمة في انتخابات الرئاسة ومجلس الشعب. وبعدين حتى لو الحزب في يوم فكر إنه يرشح جمال، هقولك بصراحة، جمال رغم عيوبه كمرشح أحسن من أي أراجوز من قيادات المعارضة التقليدية. أما بالنسبة للبرادعي فآراءه هي أقرب جدا للحزب الوطني الديموقراطي من أي حزب آخر، وإن كان هناك خلافات على بعض التفاصيل. لو انضم البرادعي للحزب الوطني الديموقراطي ستكون فرصته أكبر بكثير للترشح للرئاسة في 2017 إذا ماكانش في 2011، أو حتى مجرد التأثير على سياسات الحزب والدولة بشكل متحضر وراقي. لكن للأسف أغلب الناس بيبصوا للبرادعي على إنه نجم وبيركزوا على آراءه حول تعديل الدستور، بدون الدخول في التفاصيل حول آراءه الأخرى إللي زي ما قلت لا تختلف في جوهرها عن توجهات الحزب الوطني الديموقراطي
أخيرا، حضرتك بتقول كلام عظيم جدا على الجنب اليمين، وهو إنك عايز نظام ديمقراطي علماني في مصر يقوم علي التعددية الحزبية و يتبني الإعلان العالمي لحقوق الإنسان كمصدر رئيسي للتشريع. مافيش أحسن من كدة. ممكن أسأل حضرتك سؤال، هل يمكن تحقيق هذا الكلام في ظل الظروف الشعبية الحالية؟ يعني لو فجأة النهاردة الشعب المصري إمتلك حق إختيار نظام الحكم والحكومة، ذلك الشعب الذي لا يريد ممارسة المساواة وحرية الاعتقاد والعدالة والحرية في حياته، هل سيختار هذا الشعب نظام علماني يقوم علي التعددية الحزبية و يتبني الإعلان العالمي لحقوق الإنسان كمصدر رئيسي للتشريع ويعمل جاهدا لاستمرار مسيرة السلام في الشرق الأوسط؟ أم أن هذه الأحلام سيتم تدميرها تماما وسيأتي بدلا منها مصيبة سوداء تجعل أمثالي وأمثالك يترحمون على أيام مبارك والحزب الوطني الديموقراطي؟
عم مينا
فيه انتخابات جميل وياريت , بس اخوان لأ وألف لأ . أنا بالنسبالي وانا عايش في مصر . ديكتاتورية أحسن من الاخوان ولو الانتخابات حتجيب اخوان يبقى بلاها انتخابات ...خد نادية .
ياريت ما تفهمش كلامي غلط
بس تصحيح
الجزء الوحيد اللي كان بيعطي الجنسية بالميلاد بالمملكة المتحدة كان ايرلندا
واتوقف هذا القانون سنة 1998 للاسف
يمكن يكون ليهم سكة تانيه الله اعلم
بس انا ليا معارفي واغنيا بس مش جدا
مايتعالجوش الا في انجلترا
مش معني ده اني بعفيهم من مسولية تدهور الرعاية الطبية للمواطن العادي
بس ده فقط للدقة
وشكرا
Anonymous
سامحني في التأخير عن الرد.. بس كنت مشغول شوية اليومين دول.. هرد عليك في أقرب فرصة علي كل النقاط اللي حضرتك ذكرتها
kaka
ما أنا أكيد بردو مش بتمني ان الإخوان يحكموا مصر.. و أنا قناعتي ان الإخوان لا يمثلوا أكتر من ٢٠٪ من الشعب.. هما صوتهم عالي مش أكتر.. و في نفس الوقت الناس اللي مش عاوزاهم مش حاسة بخطورتهم لأنهم عارفين ان الإنتخابات تحت السيطرة.. بس صدقني لو في يوم من الأيام الناس دي عرفت ان الإخوان عندهم فرصة فعلية انهم ياخدوا الحكم.. ال٨٠٪ السلبيين هينزلوا يقولوا رأيهم و ساعتها أقصي حاجة هيوصلولها هو التمثيل اللي عندهم في مجلس الشعب دلوقتي.. مش أكتر
Medzag
أنا فعلاً قريت القوانين دي قبل ما أكتب البوست
و هم فعلاً عندهم سكة تانية و هي
Under the law in effect from 1 January 1983, a child born in the UK to a parent who is a British citizen or 'settled' in the UK is automatically a British citizen by birth. (Wikipedia)
و زي ما حضرتك أكيد سمعت ان جمال مبارك عنده جنسية انجليزية و علي اساس القانون اللي فوق ده فاذا اتولدت بنته في انجلترا تحصل علي الجنسية الإنجليزية بشكل فوري
Anonymous
أنا هحاول أرد عليك نقطة نقطة و لو نسيت حاجة يا ريت تقولي
أولاً انطبعاك في محله.. أنا فعلاً في شيء في نفسي ضد الرئيس مبارك و الحزب الوطني.. بس أنا مش بشخصن الأمور و لا حاجة.. الموضوع كله ان الناس دي بقالها ٣٠ سنة بتحكمنا.. و البلد حالتها زي ما انت شايف.. أعتقد من حقي أبقي مش بحبهم قوي
بالنسبة لعلاج الرئيس في ألمانيا.. فواضح ان احنا متفقين.. يعني أنا قلت انهما مبلوعة.. حضرتك شايفها مهضومة و مشخوخة كمان مفيش مشكلة
أما بالنسبة للزيادة السكانية فأنا مختلف معاك في دي.. أنا موافقك ان الزيادة السكانية بتاكل جزء كبير من التنمية اللي بتحصل.. طب هو مين اللي معملش حاجة علشان يحل الموضوع ده؟ الصين كان نعدهم مشكلة مشابهة.. عملوا ايه؟ عملوا قانون الطفل الواحد.. كل عيلة في الصين من حقها تخلف طفل واحد بس و ده اللي الحكومة مسئولة عنه صحياً و تعليمياً الخ.. أما الطفل التاني و التالت و الرابع فأهله يشربوه.. الحكومة مش هتدفع و لا مليم عليهم و بالعكس بدتفعهم ضرايب أكتر.. احنا بقي عملنا ايه في ال٣٠ سنة اللي فاتوا غير اعلان حسنين و محمدين؟
علشان بس أوضحلك اتجهاتي كويس.. أنا معظم اختلافي مع الرئيس مبارك مش في الحاجات الغلط اللي عملها بس في الحاجات الصح اللي معملهاش.. سيادتك اتكلمت علي التعليم.. و أنا معاك ان التعليم المجاني ده نكتة؟ عملنا ايه في الموضوع ده غير ان طول الوقت بنقول لا مساس بمجانية التعليم.. الرئيس مبارك شخص سلبي بالفترة.. ما بيحبش ياخد قرارات صادمة.. و دي مشكلتي الأساسية معاه
ثالثاً انت أعد بتحاول توحي ان الشعب هو المشكلة.. و أنا منكرش ان احنا كشعب بنمر بفترة سيئة جداً في تاريخنا.. و بقينا كسلانين و طائفيين و ديكتاتوريين و كل اللي انت عاوزه.. بس هو مين اللي عمل فينا كده؟ يعني هل احنا كنا طول عمرنا كده.. أقعد مع جدي و جدك و اسمهم بيتكلموا علي الشعب المصري.. هتلاقيهم بيتكلموا عن ناس تانية غيرنا.. مفيهومش الصفات دي خالص.. يا تري ليه؟ علشان مشافوش الظلم اللي الناس شايفة النهاردة.. الفقر و الذل و امتهان الكرامة يولد أكتر من اللي انت ذكرته ده..
أنا مش مختلف معاك في تحليلك للشخصية المصرية المعاصرة بس مختلف معاك في
الأسباب اللي وصلتها لكده
بالنسبة لجمال مبارك.. موضوع التوريث ده مش اختراع من المعارضة و لا حاجة و لكنه مشروع قائم.. و أنا مشدرش أدعي اني أعرف مين اللي وراه.. بس هو موجود.. يعني ممكن الرئيس نفسه يبقي ضده.. لكن الأكيد ان فيه ناس في الحزب الوطني عاوزة جمال ييجي.. و مش مستبعد انه هو يكون معندوش مانع.. و ده مش كلام خرافات.. بس أي شخص متابع للسياسة المصرية.. هيبانله جداً ان الشخص ده بيلعب دور أكبر بكتير من دور أمين السياسات في الحزب الحاكم
بالنسبة اللبرادعي فهو أفكاره فعلاً قريبة من أفكار الحزب الوطني اللي علي الورق.. لكن عملياً هو مختلف ١٠٠٪ .. برنامج الحزب الوطني جميل و لطيف.. بس هل فيها حاجة منه بتتطبق.. الرك علي التطبيق.. ما هو صفوت الشريف كل يوم الصبح بيطلع يفكرنا اننا عايشين أزهي عصور الديمقراطية.. لو في حد شايف الديمقراطية دي يشاورلي عليها
طبعاً النظام الديمقراطي العلماني اللي أنا بطالب بيه عمره ما هيتحقق و لا بكرة و لا بعده و لا غالباً في حياتي و لا حياتك.. بس علي الأقل أنا بطالب اننا ناخد خطوات في الإتجاه ده.. علي الأقل نبتدي بالتعليم.. علشان بعد ٣٠ سنة يطلعلنا جيل بيفكر و مش طائفي.. لكن انت شايف ان الحزب الوطني بيعمل أي حاجة في الإتجاه ده؟ هل بيحاول يفهم الناس يعني ايه حقوق انسان و لا هو اللي بيخترقها كل يوم؟ هل بيدعو الناس للتسامح؟ و لا معالجته الأمنية المتخلفة هي اللي وصلت العلاقة ما بين المسلمين و المسيحيين للحالة دي؟
no comment
هههههههههههههههههه البلد بقيت بيس اوف شيت ههههههههههههههههههههههههههه
حلوة حكاية زي أب عادي دي
طيب الأب العادي بيسافر علي حسابه من علي حساب الشعب وفي طائرات رئاسة الجمهورية
يا جماعه لندن اوقفت اعطاء الجنسيه لمن يولد فى لندن منذ عام1982ولكن بعد مرور 5سنوات على الاقامه المستمره فى البلد يمكنك ان تأخذ الجنسيه ولكن موضوع ولادة ماما خديجه فى لندن ماهى هتبقى ماما زى حماتها ماهى ام المصريين كلهم دلوقتى المهم ولدتها هناك اعتراف صريح من القصر الرئاسى بأن كل اطباء مصر يتمتعوا بفشل زريع فى مهنتهم
انا لما سمعت الخبر استغربببببببببببببت
والله ما عارف ايه ده
للعلم فان جمال مبارك يحمل الجنسية البريطانية وحتى تكون عائلته بريطانية اجريت الولادة هناك
Anonymous
اسمحلي اقلك انه انت واحد لا عشت نص ولا حتى 3 ايام بإنجلترا.. والدليل كلامك الي انت بتقوله..لو فعلا الزياد السكانية بتبهدل البلد متل ما حضرك تفضلت كان اول ناس وقفوا تجنيس هم البلاد الي بتدي الجنسية عمال على بطال..
بص اما المصرين يتعدلوا ويبقوا بنأدمين ويحكموا بشرع ربنا صح.. واما يبطلوا رشاوي ومحسبويات وسرقة جوا وبرا البلد يبقى البلد شكلها حيكون تاني.. الا من رحم الله..
يعني اما واحد يبلع في كرشه 80 مليار وتقولي الزيادة السكانية..اسمحلي ده تفكير واحد مصري بحت عايش بالزقازيق
اخيرا انا بعد ما قرأت كلامك شكيت انك تكون الريس المطرود خخخخخ
Opera Mini оказала значительное влияние на развитие средств мобильной связи, так как стирает прежнее важнейшее различие между смартфонами и обыкновенными телефонами. А за счёт использования специального прокси-сервера, достигается значительная экономия трафика по сравнению со встроенными браузерами телефонов или смартфонов. http://newminiopera.ru/ скачать opera mini
Post a Comment