ليس دفاعاً عن الكنيسة

الكل متابع في الاسابيع اللي فاتت حالة الجنون الطائفي اللي اصابت المصريين.. طبعا أنا مش بأدعي ان الحالة دي جديدة ولا حاجة, احنا الحمدلله الناس عندنا متجننين من فترة طويلة.. ولكن زي ما تقول من فترة للتانية بيحبوا يعبروا عن الجنان ده بصورة رسمية لحسن حد يفتكر انهم كفل الشرعقلوا ولا حاجة 

بداية المسألة ترجع الى واقعة اختفاء كاميليا شحاتة زوجة قس بدير مواس ثم هدأت المسألة شوية بعد ظهورها و اعلانها ان اختفاءها كان بسبب خلافات زوجية ليس أكتر. ولكن لأن البلد دي مش مكتوب لها الهدوء فبدأت تظهر صور لكاميليا وهي ترتدي الحجاب وخرج البعض يؤكد انها أشهرت اسلامها وان الكنيسة تحتجزها في احدي الاديرة زي ماعملت مع وفاء قسطنطين

و أثناء هذه الأحداث اختفت فتاة اخري في الاسماعيلية و كالعادة خرجت المظاهرات القبطية في الكاتدرائية وتم الرد عليها بمظاهرات في مسجد عمرو ابن العاص و مسجد القائد ابراهيم ضد الكنيسة و البابا شنودة مطالبين أمن الدولة بفك اسر كاميليا.. و خد بالك ان النظام سايب المظاهرات من الجانبين وغالبا مبسوط بيها..  نظام أهو الناس ملهية في حاجة بدل مايقرفونا بالفساد والتوريث والمادة 76 والاشراف القضائي علي الانتخابات.. لكن يوم ماتنزل مظاهرة تقول "لن نورث بعد اليوم" الأمن ينزل يضرب المتظاهرين ويعتقلهم لأن طبعا هي دي المظاهرات اللي بتمثل خطر علي البلد.. أما مظاهرات الكنائس والمساجد فدي شقاوة شعب مش أكتر

المهم بعد كده بدأت حرب الفيديوهات علي اليوتيوب فخرجت فتاة الاسماعيلية تعلن للجميع اسلامها بكامل ارادتها و طبعا رد 

المسيحيين بفيديو لكاميليا تؤكد فيها تمسكها بمسيحيتها وانها متواجدة في الدير بكامل ارادتها

بعدين دخلت جبهة علماء الازهر علي الخط و طلعت قالت للناس انتوا هتلعبوا من غيري ولا ايه؟ وراحت رازعنا بيان "قاطعوهم"  اللي بيدعو لمقاطعة المسيحيين مقاطعة كاملة حتى تعود الكنيسة لرشدها.. يلا كنا ناقصينهم دول كمان

وبعدين خرج علينا الأنبـا بيشوي في حديث للمصري اليوم قال فيه ان "الاقباط أصل البلد" والمسلمين "ضيوف حلوا علينا".. طبعا كلام ملوش أي لازمة وجي في توقيت سخيف ويدل عن جهل شديد لأن المسلمين اللي موجودين في مصر هم في غالبيتهم العظمي أقباط أسلموا مش من سكان الجزيرة العربية.. فهل كانوا أصحاب بلد وبعدين بقوا ضيوف أما أسلموا؟

المهم مفيش يومين وراح الأنبا بيشوي ضارب ضربته التانية وتسأل أذا كان بعض أيات القرآن قد تم اضافتها في زمن متأخر 

لاحظ ان الانبا بيشوي هو الرجل التاني في الكنيسة ومرشح بقوة لخلافة البابا شنودة.. ودي حاجة تخلي اللي بيحبوا واللي بيكرهوا البابا شنودة يتمنوا له طولة العمر

كل ده كوم واللي قاله د. محمد سليم العوا في برنامج بلا حدود (جزء 1, جزء 2, جزء 3, جزء 4, جزء 5) علي قناة الجزيرة كوم تاني.. الراجل قرر يحمل كل مشاكل الفتنة الطائفية للكنيسة و ان كل حاجة بدأت من قصة وفاء قسطنطين و كأن المسلمين والمسيحيين كانوا سمن علي عسل قبل 2003 و اتهم الكنيسة بجلب اسلحة من اسرائيل وتخزينها في الاديرة انتظارا لليوم اللي هيطلعوا يقتلوا بيها اخوانهم المسلمين وكلام تاني عن تقسيم الدولة واعلان دولة مستقلة للاقباط.. كلام فارغ مش عارف ازاي يطلع من واحد معاه دكتوراه وكمان موضوع الاسلحة طلع ان واد مستورد بمب ومراجيح من الصين و مادفعش الجمارك

و أنا لست بصدد الدفاع عن الكنيسة.. اولا لأن الكنيسة مؤسسة كأى مؤسسة تخطيء وتصيب.. وثانيا ان الكنيسة مسئولة جزئيا عن كتير من المشاكل الموجودة بسبب عزلهم للأقباط عن المجتمع وعند قيادتها في بعض القضايا التافهة اللي ما تستهلش في الوقت اللي بيتنازلوا في قضايا اهم بكتير

ولكن تحميل الكنيسة الليلة كلها فيه ظلم كبير ليها لأن الكنيسة في اوقات كثيرة كانت بـتلتلزم الصمت من اجل عدم اشعال الفتنة الطائفية رغم الظلم اللي كان بيبقي واقع علي الأقباط.. اسباب المشاكل بين المسلمين والمسيحيين اللي بقالها أكتر من 30 سنة معروفة و واضحة وضوح الشمس.. وهي حالة التدين الشكلي اللي اصابت المصريين و دخول أفكار جديدة علي المجتمع تحس علي كراهية الاخر.. الثقافة الجديدة دي هي اللي عملت الازمة المستمرة من ساعة حادثة الخانكة في 1972 وحادثة الزاوية الحمرا في 1981 (هي كانت سنة نحس من اولها).. الثقافة دي هي اللي خلت واحد زي د.سليم العوا يعتبر انه بيمثل الاسلام الوسطي المعتدل.. طبعا أما واحد قبطي يشوف حلقة الجزيرة ويقولوله ان ده الرجل المعتدل الهادي الوسطي.. ماتزعلوش بقي أما يروح ينتخب جمال مبارك

لازم الناس تفهم فرق   توابع المشاكل دي علي المسلمين من ناحية والاقباط من الناحية التانية.. أما المسلم بيسمع كلام الانبا بيشوي فبيغضب وده حقه.. أما القبطي بيسمع كلام د. سليم العوا فبيخاف.. لانه ببساطة بيقولك أذا كان الرجل المعتدل فيه في قلبه كل الكراهية والطائفية دي امال لو الاخوان المسلمين مسكوا هيعملوا فينا ايه؟

لو كنتوا  عاوزين  الاقباط يبقي ليهم مشاركة فعالة في مستقبل مصر ويشاركوكم في المطالبة بالتغيير واسقاط  النظام اللي كابس علي انفاسكم  من 30 سنة.. بطلوا تخوفوهم