ممتاز القط يضرب من جديد

مقاطع من مقال ممتاز القط الأخير اللي بيعلق فيه عن زيارة جمال مبارك لقرية دماص اللي تحولت لمدينة بعد زيارة القائد جمال مبارك

تحولت شوارع القرية إلي سرادق كبير للفرحة . علت صورة الرئيس مبارك كل الطرقات،  التي ازدحمت بعشرات الآلاف من المواطنين،  الذين تعالت أصواتهم بالهتاف والدعاء لقائد مصر وربان سفينتها،   بأن  يحميه الله ذخراً  لهم 

ذخراً؟؟ الراجل ده عايش في عصر تاني خالص.. حد يقوله انه الكلام ده اتغيير خلاص.. و ان النفاق له مصطلحات جديدة

في دماص دعاء حب ردده الأهالي بعفوية صادقة صاغتها كلمات شيخ مسن،  قال لأمين السياسات : » طمنا علي أبوك يا جمال يا بني

 خلاص هعيط من التأثر.. جمال مبارك ملتحم بفئات الشعب المقهورة؟

تحدث أمين السياسات لاهالي دماص وفي جمل تحريضية،  طلب من الأهالي أن يتحدثوا عن مشاكلهم،  وأن يقولوا كل شيء بصراحة،  مؤكدا أن برنامج الحزب الوطني في المرحلة القادمة،  سيكون ترجمة أمينة لكل ما يقولونه 

تحريضية؟؟؟ يا نهار اسود.. هو أما مسئول يطلب من مواطنين انه يقولوا مشاكلهم بصراحة يبقي صاحب و فكر تحريضي و ثوري؟

بس طبعاً لازم نوجه التحية للقائد جمال مبارك علي صراحته في تأكيده ان برنامج الحزب الوطني في المرحلة القادمة سيكون ترجمة أمينة لكل ما يقولونه و ده معناه اعتراف منه انه في المرحلة السابقة الترجمة كانت غير أمينة  

مصر ليست لكل المصريين

من المفترض ان أي حكومة أو نظام حاكم من واجبها انها تخدم جميع أفراد الشعب.. اللي انتخبوها و اللي ما انتخبوهاش.. و لكن واضح ان وزارة الخارجية المصرية لا تؤمن بهذا الافتراض.. و قررت انها تعمل لخدمة المصريين بالخارج المؤيدين للنظام فقط.. أما اللي ينتمي للمعارضة فهو في نظر وزارة الخارجية قد فقد جنسيته و لا يتم التعامل معه علي انه مصري و ان بلده مسئولة انها ترجعله حقوقه

أكتر من اسبوع فات علي ترحيل ١٧ مصري من الكويت بعد اعتقالهم بتهمة مخالفة قوانين الدولة بخصوص التجمعات العامة و لم تصدر وزارة الخارجية تصريح واحد تعترض و لا تندد و لا تشجب فيه ما حدث لهؤلاء المصريين

عندي بس سؤالين

 الأول للمسئولين في دولة الكويت: لو كانوا اللي نزلوا الشارع دول أمريكان و تجمهروا لشأن داخلي أمريكي.. كان بردو هيتم اعتقالهم و ترحيلهم بالطريقة المهينة دي؟

السؤال التاني  لوزارة الخارجية المصرية: لو الناس اللي اتجمعت في الكويت دول كانوا اتجمعوا لمساندة الرئيس مبارك و كانوا شايلين صوره كان هيبقي هو ده رد فعل الوزارة؟ الصمت التام و لا أكن حاجة حصلت؟

و علي رأي جلال عامر

اذا قامت كل الدول بترحيل المصريين المعارضين للنظام الحالي فلن يبقي لنا في الخارج إلا السفارات

الحزب الوطني بتاع الحرية

ممتاز القط الشهير باكسلانت ناو ناو شايف انه مش كفاية انه بيتحفنا بمقالاته الرائدة و قرر دخول عالم الكاريكاتير.. و ده بيثبت انه فعلاً متعدد المواهب و يستحق لقب سندريلا الصحافة المصرية

نيجي بقي لفكرة الكاريكاتير المبتكرة.. الأستاذ ممتاز القط بيعاتب الحزب الوطني علي ديمقراطيته اللي عرفت الناس معني الحرية.. و  خلت القلة المندسة صوتها يعلي و بيرمز للحزب الوطني في الكاريكاتير بصفوت الشريف و جمال مبارك.. الحرس القديم و الحرس
الجديد اللي اتعاونوا مع بعض لتفجير ثورة الحرية داخل الوطن

و يا ريته جه عن هنا و وقف.. لأ و كمان حب يزود حتة من عنده و يوهم المواطن ان الدكتور نظيف المحترم هو اللي ضد انه يكون فيه مناخ للحرية في مصر.. و ده أسلوب متبع منذ زمن و هو ان رئيس الوزراء هو اللي دايماً يشيل الليلة و يظهر الرئيس مبارك و رجاله و علي رأسهم صفوت الشريف و جمال مبارك و كأنهم المدافعين عن حقوق الشعب. في الوقت اللي الكل يعلم ان الدكتور نظيف ليس له دخل بأي قرارات سياسية قمعية من أي نوع لأن المساحة المسموح له التحرك فيها لا تتعدي المنظومة الإقتصادية و التي نجح فيها بشكل كبير

عشنا و شوفنا "صفوت الشريف" و "حرية" بتحطوا في جملة واحدة

موسم الهجوم علي البرادعي

مرة تانية عاودت الصحف القومية للهجوم علي الدكتور محمد البرادعي.. بالذات بعض زيارته الأخيرة للمنصورة.. واضح ان مجرد التفاف بعض الناس حواليه مخلي فيه ناس مش طايقة نفسها 

نبدأ من روزاليوسف، و رئيس تحريرها عبد الله كمال اللي بدأ سلسلة من المقالات يسخر فيها من البرادعي.. فيصفه في مقالة برئيس جمهورية الفيسبوك و مقالة اخري يتهم فيها البرادعي بالنفاق الديني و يسأله بمنتهي الوقاحة "هو أين كان سيادته يصلي    الجمعة في مقر عمله السابق في النمسا؟" طيب بالنسبة لموضوع الفيسبوك فالأخ عبد الله كمال مش عاجبه قياس شعبية شخص عن طريق جروبات الفيسبوك.. طب هي الحكومة سامحة بعمل استطلعات للرأي علشان يبقي فيه طريقة تانية؟ و الصحف القومية اللي طول الوقت قرفانا بشعبية الرئيس مبارك.. ممكن نعرف قاسوا الشعبية دي ازاي؟
أما بالنسبة لتهمة خلط الدين بالسياسة.. هو خلاص علشان واحد راح يصلي الجمعة بقي بيستخدم الدين لأسباب سياسية.. اللي فعلاً بيلعب علي المشاعر الدينية هو عبد الله كمال نفسه بمحاولة ايحائه ان البرادعي شخص غير متدين و انه ما كانش بيصلي الجمعة و هو في النمسا

أما بقي بالنسبة لمحرر الجريدة اللي كتب خبر بعنوان البرادعي يسقط في المنصورة و سرد في تفاصيله بعض الوقائع اللي واضح انه الوحيد اللي شافها لأن مفيش أي جريدة تانية أشارت ليها.. فبيقول 

وحاول أنصار البرادعي التشويش علي إمام المسجد أثناء الخطبة التي دعا فيها إلي ضرورة اتباع أولي الأمر ودعائه بالشفاء للرئيس مبارك فأمن المصلين بصوت مرتفع جداً. 

فيما أصيب 3 أفراد بإصابات مختلفة منهم شاب بحالة إغماء بعد قيام عدد من شباب حركة 6 أبريل بلكمة في الوجه كما أصاب بنزيف في الفم والأنف ودفع سيدة لتسقط طفلها من يديها أثناء تأمينهم «البرادعي» بعد أن تقمصوا دور الـبودي جارد. 

 كما جرت مناظرات بين المواطنين وأنصار البرادعي بعدما أعلنوا رفضهم لترشيحه حتي لا يكون الحاكم صناعة أمريكية تنفذ أجندة الولايات المتحدة مثلما كان ينفذها في الوكالة الذرية

طبعاً الأخ الصحفي يتحسد علي خياله الواسع و لكن ينافسه في الحنكة الصحفية زميله الأخر في روزاليوسف بردو اللي كتب مقالة البرادعي بالونة الدخان الأسود اللي بيصف فيها المتلقين لأفكار البرادعي بالعبط

متلق «عبيط».. تخدعه شعارات تتحدث عن التغيير.. و«تلف دماغه» عبارات من نوع لقمة العيش مرتبطة بتغيير الدستور.  

بس طبعاً الصحفي ده غلبان لأنه ترعرع في نظام مبارك اللي عرف يقنع الشعب ان الدستور و الإنتخابات و السياسة دي حاجات عيب اللي المواطن الصالح يتكلم فيها و أحسن يخليه في أكل عيشه

ده غير خبر تاني من نفس الجرنال بتدعي ان أنصار البرادعي دخلوا المسجد بالأحذية مما أثار حفيظة المواطنين.. أه يا مناصرين البرادعي يا أعداء الإسلام


و زيادة علي كده فنائب رئيس جامعة الأزهر اتهم البرادعي بازدراء الأديان لادعائه انه استهزء بالحجاب.. بردو التصريحات دي واضح ان نائب رئيس جامعة الأزهر هو الوحيد اللي سمعها

أما جريدة الأهرام فنزلت خبر بعنوان الجبهة الشعبية توجه ١٤ اتهام للبرادعي.. الخبر فيه أجزاء تدرس زي

من بين هذه الاتهامات تناقضات تقارير البرادعى والتواطؤ ضد العراق لمصلحة الولايات المتحدة وتقرير بأن إسرائيل بريئة وأن مصر لديها يورانيوم عالى للتخصيب واستمعت المحكمة لتسجيل لشهادة الدكتور يسري أبو شادي كبير مفتشي الوكالة الدولية للطاقة الذرية السابق التي اتت شهادته بما يدل علي تكوين لوبي مناهض للدول العربية‏

و لكن أقوي ما جاء في الخبر هو

 وأوضح أحمد جبيلي رئيس حزب الشعب ان البرادعي هو المسئول عن ضرب السودان وسوريا وهو المسئول عن قتل زعيم العروبة صدام حسين يوم عيد الأضحي‏.‏

و طبعاً ده كلام سليم لأن الأمريكان ما كانوش عارفين معاد عيد الأضحي امتي و هنا تدخل البرادعي بعبقريته و قالهم "عيد الأضحي النهاردة يا رجالة.. اقتلوه"٠

زي ما انت شايفين رئيس الحزب الشعب الديمقراطي.. اللي كل ما حد يطالب بتعديل المادة ٧٦ للسماح للمستقلين بالترشح يقولولنا ما عندك ٢٤ حزب..  عاوزين ايه تاني؟ والله الفيديو ده أكبر دليل علي الخلل اللي في الدستور المصري اللي يخلي واحد زي البرادعي مدير عام الوكالة الذرية لمدة ١٢ عام و حاصل علي جايزة نوبل و قلادة النيل ما يقدرش يترشح و البئف اللي في الفيديو ده من حقه الترشيح لمنصب رئيس الجمهورية.. الراجل بيقولك ان البرادعي هو المسئول عن أزمة العيش و الأنابيب و علي استيلاء اسرائيل علي المقدسات الإسلامية في القدس.. أحا يعني (أحب أسجل ان دي أول مرة أقوم باستخدام هذه الألفاظ في المدونة و لكن موعدش بعدم تكرارها طول ما الكائنات دي لسة عايشة معانا)٠