اسقاط شرعية يوليو واعلان الجمهورية الثانية

هي العيال بتوع التحرير دي عايزة ايه تاني؟

السؤال التاريخي اللي بيردده جزء مش قليل من المصريين.. ورغم تحفظي علي السؤال في حد ذاته لأن المؤمنين بالثورة وبأهمية تحقيق أهدافها ما هماش موجودين في التحرير فقط ولكن موجودين في كل المحافظات وكل واحد فيهم بيشارك بطريقته في نشر الفكر الثوري عبر المبادرات المختلفة والمسيرات والمظاهرات التي يسميها البعض بالفئوية

المهم نرجع للسؤال اللي الثوار بقالهم بيجاوبوا عليه من يوم 11 فبراير لغاية النهاردة ولكن للأسف فيه ناس كتير مش فاهمة أو مش عاوزة تفهم أو فاهمة وبتستهبل

ولكن لنكون منصفين يجب الإعتراف ان عدم وجود قيادة واضحة للثورة واللي هو كان أهم أسباب نجاحها بيخلي ناس كتير متلخبطة ومش فاهمة فعلا العيال دي عايزة ايه.. وأكبر دليل علي كده انك أما تسأل أي حد هي ايه مطالب يوم 25 يناير اللي جاي هتسمع أكتر من اجابة.. من اسقاط المجلس العسكري لتسليم السلطة للبرلمان لإنتخاب رئيس جمهورية قبل انتخابات الشوري لتطهير الداخلية والإعلام وحتى الشعار الموحد بين جميع القوي الثورية "يسقط حكم العسكر"  ففئة كبيرة من الشعب مش فاهماه وكمان خايفة منه.. اللي  فاكر ان الثوار بيطالبوا باسقاط الجيش واللي فاكر انهم بيطالبوا باسقاط المجلس العسكري المتمثل في أعضائه ال19

ولكن الحقيقة ان هتاف "يسقط حكم العسكر" مش المقصود به طنطاوي وشلته لكن المقصود بيه حكم العسكر اللي مسيطر علي مقاليد الحكم في مصر من يوليو 1952.  الناس بس نسيت علشان مبارك لبسلهم بدلة وبسبب ظهور جمال مبارك ورجال الأعمال علي الساحة في ال10 سنين اللي فاتت 

المجلس العسكري نجح تماما في ايهام قوي الشعب ان الثورة دي كانت علي نظام مبارك وابنه مش علي نظام العسكر ومن اللحظات الفارقة اللي عبر عنها اللوا ممدوح شاهين عن هذه الفكرة أما اتسأل انتم ليه مالغيتوش نسبة ال50% عمال وفلاحين في مجلس الشعب. فكانت الاجابة إن دي من مكتسبات ثورة يوليو وما نقدرش نمسها 

وعلشان كده طبيعي انك ما تحسش ان فيه حاجة اتغيرت بعد الثورة.. الانتخابات كانت مش مزورة آه لكن بتتم في نفس أجواء أي انتخابات مضت ما بين أحكام قضائية لإعادتها بسبب تغيير صفة مرشح من عمال لفئات وما بين استخدام فج للشعارات الدينية . وعمليات فرز فوضوية, الداخلية لسة بتعامل المواطنين كأنهم حيوانات والإعلام بينافق اللي في السلطة والإخوان بتفاوضوا مع العسكر.. ما هي كل دي مكتسبات ثورة يوليو

وعلشان كده علي الثوار انهم يوصلوا فكرتهم للناس عن طريق صياغة المطلب الحقيقي لثورة 25 يناير وهو اسقاط شرعية يوليو والإعلان عن تأسيس الجمهورية الثانية